ក្រុមមានសម្ព័ន្ធជាមួយអ៊ុយក្រែន បានប្រាប់សារព័ត៌មាន Express ថា ប្រទេសរុស្ស៊ីនឹងធ្លាក់ចូលទៅក្នុង «ជម្លោះជាតិសាសន៍ដ៏ធំ» នៅពេលដែលរបបរបស់លោក Vladimir Putin ដួលរលំ។

Atesh គឺជាក្រុមមានសម្ព័ន្ធជាមួយអ៊ុយក្រែនដែលមានមូលដ្ឋាននៅឧបទ្វីប Crimea (គ្រីម៉ា) ដែលសមាជិកភាគច្រើនជាជនជាតិភាគតិច Tatar (តាតារ៍) និងអ៊ុយក្រែន។ ដោយមានន័យថា «ភ្លើង» នៅក្នុងភាសាតាតារ៍ ក្រុម Atesh ត្រូវបានបង្កើតឡើងភ្លាមៗបន្ទាប់ពីមានការលុកលុយពេញទំហឹងរបស់លោក Putin លើអ៊ុយក្រែន ក្នុងឆ្នាំ២០២២។

មុខងារចម្បងរបស់ក្រុមនេះ រួមមានប្រតិបត្តិការបំផ្លិចបំផ្លាញប្រឆាំងនឹងកងទ័ពរុស្ស៊ី ក៏ដូចជាការប្រមូលផ្ដុំការស៊ើបការណ៍ និងជួយចលនាតស៊ូគាំទ្រអ៊ុយក្រែននៅក្នុងដែនដីដែលត្រូវបានកាន់កាប់។ ក្រុមនេះបានផ្ដល់ការខូចខាតយ៉ាងធ្ងន់ធ្ងរបំផុត ចំពោះយោធារបស់លោក Putin នៅពេលដែលពួកគេបានជួយរៀបចំការវាយប្រហារដោយមីស៊ីលលើទីស្នាក់ការកណ្តាលនៃកងនាវាចរសមុទ្រខ្មៅរបស់រុស្ស៊ី កាលពីខែកញ្ញា ឆ្នាំ២០២៣ ដោយបានសម្លាប់មន្រ្តី ៣៤នាក់ និងបង្ករបួសដល់មនុស្សជាង ១០០នាក់ផ្សេងទៀត។

សមាជិកម្នាក់របស់ក្រុមនេះបានប្រាប់សារព័ត៌មាន Express ថា ពួកគេកំពុងប្រឹងប្រែងយ៉ាងសកម្ម ក្នុងការបង្កើតសម្ព័ន្ធភាពជាមួយក្រុមជនជាតិភាគតិតាតារ៍ផ្សេងទៀត នៅក្នុងប្រទេសរុស្ស៊ី ក្នុងគោលបំណងដើម្បីជំរុញការបះបោរជនជាតិភាគតិចប្រឆាំងនឹងរបបរបស់លោក Putin។

ប្រទេសរុស្ស៊ីត្រូវបានបង្កើតឡើងដោយភាពស្មុគស្មាញនៃវប្បធម៌ចម្រុះរបស់ជនជាតិភាគតិច និងប្រជាជនដោយមានជាង ១៩០សញ្ជាតិផ្សេងៗគ្នារស់នៅក្នុងប្រទេស។ ហើយបើយោងតាមជំរឿនជាតិឆ្នាំ២០១០ បានឲ្យដឹងថា ជនជាតិតាតារ៍ បង្កើតបានជាក្រុមធំជាងគេបំផុត ដែលមានប្រជាជនជាង ៥,៣លាននាក់៕