​បាល់ទាត់៖ ​ក្រុមបាល់ទាត់​កូរ៉េ​បាន​បន្ត​ស្ថិតិ​ប្រកួត​មិន​ចាញ់​នៅក្នុង​ពូ​ល B នៃ​វគ្គ​ជំ​រុះ World Cup ២០២២ តំបន់​អាស៊ី​ជុំ​ទី​៣ ក្រោយ​យកឈ្នះ​អារ៉ាប់​រួម ១-០ ថ្ងៃ​ព្រហស្បតិ៍​ម្សិលមិញ​។ ​​ការប្រកួត​នៅ​ទឹកដី​កូរ៉េ​នៅ​កីឡដ្ឋាន Goyang ទីក្រុង Goyang មួយ​គ្រាប់​របស់​ក្រុម​ម្ចាស់ផ្ទះ​សំរេចបាន​នៅ​នាទី​ទី៣៦ ដោយ​បាល់​ពិន័យ ១១ម៉ែត្រ​របស់ Hwang Hee-chan ក្រោយ​កំ​ហុង​របស់​ខ្សែការពារ​អារ៉ាប់​រួម​លើ​កីឡាករ​កូរ៉េ Hwang In-Boem​។

​​កូរ៉េ​ក៏មាន​ឱកាស​បន្តទៀត​ដោយ​ខ្សែប្រយុទ្ធ Spurs, Heung-min Son នៅ​ចុង​វគ្គ​ទី១ តែ​មិនបាន​សំរេច​ ខណៈក្រុម​ភ្ញៀវ​មានឱកាស​នៅ​វគ្គ​ទី២ ផងដែរ​ដោយ Tahnoon Al Zaabi នៅ​នាទី​ទី៦១ តែ​ជួយសង្គ្រោះ​ដោយ​អ្នកចាំទី​។ ​​១-០ នេះ​ក៏​រក្សា​ដល់​ចប់​ការប្រកួត​ធ្វើឱ្យ​កូរ៉េ​ទទួលបាន​ ៣ពិន្ទុ​ជា​លើក​ទី៣ ក្នុង ៥ប្រកួត​នេះ និង​ស្មើ២ ប្រកួត​មាន ១១ពិន្ទុ ​ខណៈ​អារ៉ាប់​រួម​ឈរ​លេខ ៤ មាន ៣ពិន្ទុ​ប៉ុណ្ណោះ​។ ​​យ៉ាងណាក្តី​កូរ៉េ​នៅតែ​ឈរ​លេខ ២ ដដែល​ដោយមាន ១១ពិន្ទុ​នៅ​ពីក្រោម​អ៊ីរ៉ង់ ២ពិន្ទុ​បន្ទាប់ពី​អ៊ីរ៉ង់​វាយបក​យកឈ្នះ​លី​បង់​ចុង​ម៉ោង ២-១​។ ​​អ៊ីរ៉ង់​ស្ទើរ​តែ​មិនបាន​ទាំង ១ពិន្ទុ​ទៀត​ផងដែរ​បន្ទាប់ពី​លី​បង់​នាំមុខ​តាំងពី​នាទី​ទី៣៧ ដោយ Soony Saad តែ​ចុង​ម៉ោង​ទៅហើយ​នាទី​ទី​៩០+២ អ៊ីរ៉ង់​ក៏​តាម​ស្មើ​វិញ​បាន​ដោយ Sardar Azmoun​។​

​​កាន់តែ​ខកចិត្ត​ទៅទៀត​សំរាប់​លី​បង់​នោះ ​គឺ​អ៊ីរ៉ង់​ថែមទាំង​រកបាន​គ្រាប់​ជ័យជំនះ​ទៀត​នៅ​នាទី​ទី៩០+៥ ទៅហើយ​ដោយ Ahmad Nourollahi​។ ​​ជ័យជំនះ​នេះ​ធ្វើឱ្យ​អ៊ីរ៉ង់​នៅតែ​មិនទាន់​ចាញ់​ដែរ​មាន ១៣ពិន្ទុ​ក្រោយ​លេង ៥ប្រកួត​ឈ្នះ ៤ ស្មើ ១ ខណៈ​លី​បង់បន្ត​ឈរ​លេខ ៣ មាន ៥ពិន្ទុ​។​ ​​រីឯ​មួយគូ​ទៀត​ក្នុង​ពូ​ល A នេះ​អ៊ីរ៉ាក់​ និង​ស៊ី​រី​បាន​ត្រឹម​ស្មើគ្នា ១-១ មានន័យថា​ អ៊ីរ៉ាក់​បន្ត​ឈរ​លេខ ៤ មាន ៤ពិន្ទុ ​ខណៈ​ស៊ី​រី​បន្ត​ឈរ​ក្រោម​គេ​មាន ២ពិន្ទុ​។ ​​ប្រកួត​បន្ទាប់​នៅ​ថ្ងៃទី១៦ សប្តាហ៍​ក្រោយ អ៊ីរ៉ាក់​ជួប​កូរ៉េ, ស៊ី​រី​ជួប​អ៊ីរ៉ង់ និង​លី​បង់​ជួប​អារ៉ាប់​រួម​៕

​អត្ថបទ​៖​នាង សុភា​វុ​ធ