ប្រធានាធិបតីកូឡុំប៊ី លោក Gustavo Petro កាលពីថ្ងៃអង្គារ (ទី៤ ខែកុម្ភៈ) បានបញ្ជាឲ្យក្រុមហ៊ុនប្រេងរដ្ឋ Ecopetrol លុបចោលការបណ្តាក់ទុនរួមគ្នាជាមួយក្រុមហ៊ុនគ្រប់គ្រងដោយសហរដ្ឋអាមេរិក ដែលត្រូវបានគេរំពឹងថា នឹងផលិតប្រេងប្រហែល ៩០.០០០បារ៉ែល ក្នុងមួយថ្ងៃ ដោយលើកឡើងពីការព្រួយបារម្ភអំពីបរិស្ថាន។

តាមរយៈសុន្ទរកថាលើកញ្ចក់ទូរទស្សន៍ជាតិ លោក Petro បាននិយាយថា លោកប្រឆាំងនឹងការបន្តកិច្ចព្រមព្រៀងនាពេលថ្មីៗនេះ រវាងក្រុមហ៊ុន Ecopetrol និង Occidental Petroleum ឬ Oxy ព្រោះថា មានពាក់ព័ន្ធនឹងការទាញយកប្រេងតាមបច្ចេកទេសដ៏ចម្រូងចម្រាសមួយដែលប្រើដើម្បីទាញយកប្រេង និងឧស្ម័នពីស្រទាប់ថ្ម ដែលត្រូវបានរិះគន់ដោយក្រុមបរិស្ថាន។

អំឡុងកិច្ចប្រជុំជាមួយគណៈរដ្ឋមន្ត្រីរបស់លោក ដែលត្រូវបានផ្សាយបន្តផ្ទាល់នៅលើបណ្ដាញសង្គម លោក Petro បាននិយាយថា៖ «ខ្ញុំចង់ឲ្យលក់ប្រតិបត្តិការនោះ ហើយខ្ញុំចង់បានប្រាក់វិនិយោគនៅក្នុងថាមពលស្អាត។ យើងប្រឆាំងនឹងការប្រើបច្ចេកទេសយកប្រេងតាមស្រទាប់ថ្មនោះ ព្រោះការធ្វើឲ្យបែកស្រទាប់ថ្មនោះ ជាការបំផ្លាញធម្មជាតិ និងសម្លាប់មនុស្សជាតិ»។

ក្រុមហ៊ុន Ecopetrol បានប្រកាសកាលពីថ្ងៃចន្ទដើមសប្ដាហ៍ថា ខ្លួននឹងបន្តប្រតិបត្តិការរបស់ខ្លួនជាមួយក្រុមហ៊ុន Oxy នៅក្នុងអាង Permian ជាតំបន់ផលិតប្រេងដែលលាតសន្ធឹងលើរដ្ឋតិចសាស់ និង New Mexico (ញូវម៉ិកស៊ិកកូ) ដើម្បីអភិវឌ្ឍអណ្តូងប្រេងចំនួន ៩១អណ្ដូង ដោយមានប្រាក់វិនិយោគជាង ៨៨០លានដុល្លារ៕