ក្រសួងព័ត៌មាន និងវប្បធម៌របស់ក្រុមតាលីបង់ បានឲ្យដឹងកាលពីថ្ងៃអង្គារថា ខ្លួនបានផ្អាកស្ថានីយវិទ្យុស្ត្រីអាហ្វហ្គានីស្ថាន ដោយលើកឡើងពី «ការផ្តល់ខ្លឹមសារ និងកម្មវិធីដោយគ្មានការអនុញ្ញាត» ដល់បណ្តាញ ទូរទស្សន៍នៅក្រៅប្រទេស។

នេះ គឺជាលើកទី២ ហើយដែលអាជ្ញាធរ បានបិទវិទ្យុមួយជុំវិញការចោទថា បានធ្វើការជាមួយប្រព័ន្ធផ្សព្វផ្សាយបរទេស។

ក្រសួងបានលើកថា វិទ្យុ Begum បានបំពានគោលការណ៍ផ្សាយ និងប្រើប្រាស់អាជ្ញាប័ណ្ណរបស់ខ្លួនដោយមិនត្រឹមត្រូវ។ ក្រសួងបានបញ្ជាក់ថា៖«ការសម្រេចចិត្តនេះ កើតឡើង បន្ទាប់ពីការរំលោភជាច្រើន រួមទាំងការផ្តល់ខ្លឹមសារ និងការសរសេរកម្មវិធីដែលគ្មានការអនុញ្ញាត ដល់ប៉ុស្តិ៍ទូរទស្សន៍ ដែលមានមូលដ្ឋាននៅបរទេស» ដោយបន្ថែមថា ខ្លួននឹងពិនិត្យមើលឯកសារចាំបាច់ទាំងអស់ ដើម្បីកំណត់អនាគតរបស់ស្ថានីយវិទ្យុនេះ។

វិទ្យុ Begum បានបើកដំណើរការ នៅថ្ងៃទិវានារីអន្តរជាតិ ក្នុងខែមីនា ឆ្នាំ ២០២១ រយៈពេល ៥ខែ មុនពេលក្រុមតាលីបង់ វិលត្រឡប់មកគ្រប់គ្រងអំណាចវិញ ចំពេលសហរដ្ឋអាមេរិក និងអង្គការណាតូ បានដកកងទ័ព ចេញពីប្រទេសនេះ។ 

ខ្លឹមសាររបស់ស្ថានីយវិទ្យុនេះ ត្រូវបានផលិតទាំងស្រុងដោយស្ត្រីអាហ្វហ្គានីស្ថាន។ ប៉ុស្តិ៍ផ្កាយរណបដែលជាសាខារបស់ទូរទស្សន៍ Begum ដំណើរការពីប្រទេសបារាំង និងផ្សាយកម្មវិធីអប់រំ ដែលគ្របដណ្តប់កម្មវិធីសិក្សារបស់សាលាអាហ្វហ្គានីស្ថាន ចាប់ពីថ្នាក់ទី ៧ ដល់ទី ១២។