ទីភ្នាក់ងារសារព័ត៌មានរដ្ឋ WAFA បានរាយការណ៍ថា នាយករដ្ឋមន្រ្តីប៉ាឡេស្ទីន លោក Mohammad Mustafa កាលពីថ្ងៃអង្គារ បានប្រកាសអំពីការបង្កើតគណៈកម្មាធិការការងារមួយ ដើម្បីគ្រប់គ្រងកិច្ចការនៅតំបន់ហ្កាហ្សាស្ទ្រីប តាមការណែនាំពីប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស ( Mahmoud Abbas)  

លោក Mustafa បាននិយាយក្នុងអំឡុងកិច្ចប្រជុំគណៈរដ្ឋមន្ត្រីប្រចាំសប្តាហ៍ នៅទីក្រុងរ៉ាម៉ាឡា          ( Ramallah)ថា ការសម្រេចនេះ មានគោលបំណងបញ្ជាក់ពី«ការរួបរួមនៃទឹកដីរបស់រដ្ឋប៉ាឡេស្ទីន» និងពង្រឹងការបង្រួបបង្រួមជាតិ។

លោកបានបន្ថែមថា គណៈកម្មាធិការនេះ នឹងសម្របសម្រួលការផ្តល់ជំនួយមនុស្សធម៌ បោសសម្អាតកម្ទេចកម្ទី ផ្លូវបើកចំហ និងបង្កើតជម្រកបណ្តោះអាសន្នសម្រាប់ជនភៀសខ្លួន មុនពេលកិច្ចខិតខំប្រឹងប្រែងកសាងឡើងវិញកាន់តែទូលំទូលាយ ចាប់ផ្តើម។

លោក Mustafa បានសង្កត់ធ្ងន់លើការយកចិត្តទុកដាក់របស់រដ្ឋាភិបាល លើការស្ដារឡើងវិញនូវសេវាមូលដ្ឋាន រួមទាំងទឹក អគ្គិសនី ការថែទាំសុខភាព និងការអប់រំ តាមរយៈបន្ទប់ប្រតិបត្តិការសង្គ្រោះបន្ទាន់មួយនៅក្នុងតំបន់រដ្ឋបាលខេត្តភាគខាងត្បូងនៃតំបន់ហ្កាហ្សា។ លោកបាននិយាយថា៖«ការទទួលខុសត្រូវថ្នាក់ជាតិរបស់យើង បង្ខំយើងឲ្យគាំទ្រប្រជាជនរបស់យើង ដែលបានស៊ូទ្រាំនឹងភាពរន្ធត់នៃសង្គ្រាមរយៈពេល ១៥ខែ»។

សេចក្តីប្រកាសនេះ បានធ្វើឡើងប៉ុន្មានថ្ងៃ បន្ទាប់ពីការិយាល័យប្រព័ន្ធផ្សព្វផ្សាយរដ្ឋាភិបាល ដែលគ្រប់គ្រងដោយក្រុមហាម៉ាស នៅហ្កាហ្សា បានប៉ាន់ប្រមាណថា ការខាតបង់ដោយផ្ទាល់ពីការវាយលុករបស់យោធាអ៊ីស្រាអែល មានចំនួនជាង ៥០ពាន់លានដុល្លារអាមេរិក ទាំងផ្នែកហេដ្ឋារចនាសម្ព័ន្ធ និងសេដ្ឋកិច្ច។

លោក Mustafa បាននិយាយថា ផែនការកសាងឡើងវិញ នឹងត្រូវបានសម្របសម្រួល ជាមួយអេហ្ស៊ីប ដែលមានព្រំប្រទល់ជាប់តំបន់ហ្កាហ្សា និងបានសម្រុះសម្រួលគ្នារវាងក្រុមហាម៉ាស និងអ៊ីស្រាអែលជាមួយកាតា និងសហរដ្ឋអាមេរិក។