ទីក្រុង New Albany របស់សហរដ្ឋអាមេរិក បានប្រាប់ឲ្យដឹងថា នគរបាលរដ្ឋ Ohio កំពុងតាមស្វែងរកអ្នកបាញ់ប្រហារដែលបានសម្លាប់មនុស្សម្នាក់ និងបង្ករបួស ៥នាក់ផ្សេងទៀត នៅឯអគារឃ្លាំងមួយកន្លែង ក្នុងទីក្រុងនេះ កាលពីថ្ងៃអង្គារ (ទី៤ ខែកុម្ភៈ)។

រដ្ឋបាលទីក្រុង New Albany បានឲ្យដឹងនៅក្នុងសេចក្តីថ្លែងការណ៍តាមអ៊ិនធឺណិតថា ខ្មាន់កាំភ្លើងត្រូវបានកំណត់អត្តសញ្ញាណ ហើយនគរបាល កំពុង «ធ្វើការ ដើម្បីនាំយកជនសង្ស័យទៅឃុំខ្លួន»។ រដ្ឋបាលបានបន្ថែមថា ឃ្លាំងនោះត្រូវបានជម្លៀសបុគ្គលិកចេញទាំងអស់។

ដោយមិនផ្តល់ព័ត៌មានលម្អិត ស្នងការនគរបាលក្រុង New Albany លោក Greg Jones បានប្រាប់សារព័ត៌មាន NBC4 ថា ហេតុការណ៍នេះ ហាក់ដូចជា «ប្រភេទនៃការវាយប្រហារដោយកំណត់គោលដៅ»។ លោកបានបន្ថែមថា មិនមានការឈ្លោះប្រកែកគ្នាណាមួយកើតឡើងឡើយ មុនមានការបាញ់ប្រហារនោះ ហើយមូលហេតុក៏មិនត្រូវបានបញ្ចេញឲ្យដឹងដែរ។

របាយការណ៍ បានបន្ថែមថា អាវុធមួយដើមត្រូវបានរកឃើញនៅកន្លែងកើតហេតុ ដោយមិនបានផ្តល់ព័ត៌មានលម្អិត អំពីប្រភេទអាវុធនោះ។

បើតាមការបញ្ជាក់ពីប្រមុខផ្នែកទំនាក់ទំនង និងទីផ្សាររបស់រដ្ឋបាលក្រុង New Albany លោក Josh Poland បានឲ្យដឹងថា ជនរងគ្រោះទាំង ៥រូប ត្រូវបានបញ្ជូនទៅមន្ទីរពេទ្យ ដើម្បីព្យាបាលរបួស៕