ក្រសួងការបរទេសចិន នៅថ្ងៃពុធ (ទី៥ ខែកុម្ភៈ)នេះ បានប្រាប់ឲ្យដឹងថា ប្រទេសចិនមានឆន្ទៈក្នុងការធ្វើការជាមួយសហភាពអឺរ៉ុប (EU) ដើម្បីបង្កើនកិច្ចសហប្រតិបត្តិការ និងឆ្លើយតបទៅនឹង «បញ្ហាប្រឈមជាសកល» ខណៈដែលប្លុកនេះបានប្រឈមនឹងលទ្ធភាពដំឡើងពន្ធរបស់សហរដ្ឋអាមេរិក លើការនាំចេញទៅកាន់ប្រទេសដែលមានសេដ្ឋកិច្ចធំជាងគេបំផុតរបស់ពិភពលោក។

អ្នកនាំពាក្យក្រសួងការបរទេសចិន លោក Lin Jian បាននិយាយថា៖ «ពិភពលោកកំពុងប្រឈមនឹងហានិភ័យនៃការបែងចែក ការបែកបាក់ និងភាពចលាចល។ ទំនាក់ទំនងចិន-សហភាពអឺរ៉ុប មានសារៈសំខាន់ជាយុទ្ធសាស្ត្រ និងឥទ្ធិពលជាសកល»។

កាលពីថ្ងៃអង្គារ ប្រធានពាណិជ្ជកម្មរបស់ EU បាននិយាយថា ប្លុកចង់ភ្ជាប់ទំនាក់ទំនងយ៉ាងឆាប់រហ័សជាមួយសហរដ្ឋអាមេរិក ពាក់ព័ន្ធនឹងបញ្ហាពន្ធគយដែលបានគ្រោងទុករបស់ប្រធានាធិបតី លោក Donald Trump។ ចំណែកប្រមុខគណៈកម្មការអឺរ៉ុប លោកស្រី Ursula von der Leyen បានព្រមានថា ការចរចាជាមួយក្រុងវ៉ាស៊ីនតោន នឹងមានភាពតានតឹង។

ខណៈដែលទំនាក់ទំនងឆ្លងមហាសមុទ្រអាត្លង់ទិក ស្ថិតនៅក្រោមភាពតានតឹង ដោយសារការគំារមកំហែងដំឡើងពន្ធរបស់លោក Trump ការអំពាវនាវរបស់ចិនដល់បណ្ដាមេដឹកនាំអឺរ៉ុប ដូចជាលោកស្រី von der Leyen ជាដើម កំពុងបង្ហាញសញ្ញាពីការមានឆន្ទៈ ក្នុងការគិតគូរឡើងវិញ អំពីទំនាក់ទំនង រវាងទីក្រុងប៉េកាំង និងទីក្រុងប្រ៊ុចសែល ជាចំណងដែលត្រូវបានធ្វើតេស្តដោយភាពតានតឹងពាណិជ្ជកម្ម និងទំនាក់ទំនងរបស់ចិនជាមួយរុស្ស៊ី៕