ក្រុមអង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា អរិភាពដែលកំពុងកើនឡើង នៅក្នុងរដ្ឋ North Darfur និង South Kordofan របស់ប្រទេសស៊ូដង់ កំពុងបង្កើនចំនួនជនស៊ីវិលស្លាប់ និងជនភៀសខ្លួន ដោយបង្កឲ្យមានការព្រួយបារម្ភយ៉ាងខ្លាំង។

យោងតាមអង្គការទេសន្តរប្រវេសន៍អន្តរជាតិ(IOM)បានឲ្យដឹងថា ក្នុងរយៈពេល ១០ខែកន្លងទៅនេះ មនុស្សជាង ៦០០.000នាក់ បានភៀសខ្លួនចេញពីទីក្រុង El Fasher និងតំបន់ផ្សេងទៀត នៅក្នុងរដ្ឋ North Darfur ដើម្បីស្វែងរកសុវត្ថិភាព។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា «ក្នុងរយៈពេលប៉ុន្មានសប្តាហ៍ថ្មីៗនេះ ការវាយប្រហារត្រូវបានគេរាយការណ៍ នៅទូទាំងតំបន់ El Fasher និងតំបន់ជុំវិញ រួមទាំងជំរំជនភៀសខ្លួន Abu Shouk មន្ទីរពេទ្យ Saudi និងតំបន់ភាគខាងលិចនៃទីក្រុងនេះ»។ «លក្ខខណ្ឌទុរ្ភិក្ស ត្រូវបានបញ្ជាក់នៅក្នុងជំរំ Abu Shouk ក្នុងខែធ្នូ ហើយត្រូវបានគេរំពឹងថា នឹងបន្តរហូតដល់ខែឧសភា ឆ្នាំនេះ»។

ការិយាល័យនេះ ក៏ព្រួយបារម្ភផងដែរដោយការកើនឡើងនៃអរិភាព នៅក្នុងទីក្រុង South Kordofan ចំពេលមានការប្រយុទ្ធគ្នារវាងកងទ័ពស៊ូដង់ និងចលនារំដោះប្រជាជនស៊ូដង់ខាងជើង។