ភ្នំពេញ ៖ លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធ នឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានបញ្ជាក់ថា៖ ជំងឺគ្រុនចាញ់ នៅតែបង្ករភាពគ្រោះថ្នាក់បំផុតបណ្តាលឲ្យប៉ះពាល់ដល់សុខភាពសាធារណៈ សេដ្ឋកិច្ចហើយ នឹងសង្គម។

ការថ្លែងរបស់លោកវេជ្ជបណ្ឌិត ហ៊ុយ រ៉េកុល យ៉ាងដូច្នេះ នាឱកាសផ្តល់កិច្ចសំភាសន៍ជាមួយអ្នកយកព័ត៌មាន BTV ព័ត៌មាន ស្តីពី៖ វឌ្ឍនភាពការងារប្រយុទ្ធ នឹងជំងឺគ្រុនចាញ់ ក្នុងបរិបទកូវីដ-19 ឆ្នាំ២០២១, នាព្រឹកថ្ងៃទី១២ ខែវិចិ្ឆកានេះ។ លោកវេជ្ជបណ្ឌិត បន្តថា​សម្រាប់ប្រទេសកម្ពុជាយើង ស្ថានភាពជំងឺគ្រុនចាញ់ ក្នុងអំឡុងទសវត្សរ៍ឆ្នាំ៨០-៩០ រហូតមកដល់បច្ចុប្បន្ននេះ បើសម្លឹងមើលស្ថានភាពក្នុងអំឡុងទសវត្សរ៍ឆ្នាំ៩០នោះ អ្នកកើតជំងឺគ្រុនចាញ់តិចបំផុតពី៦ម៉ឺនករណី រហូតដល់១៧ម៉ឺនករណី ក្នុងមួយឆ្នាំៗ។ ហើយក្នុងអំឡុងពេលនោះ បើយោងតាមរបាយការណ៍មានករណីស្លាប់ពី១០០ រហូតដល់ជិត៩០០នាក់ ក្នុងមួយឆ្នាំ។ ដោយឡែកស្ថានភាពនេះ ត្រូវបានរាជរដ្ឋាភិបាលកម្ពុជា យកចិត្តទុកដាក់ទៅលើសុខភាពសាធារណៈ និងចាត់វិធានការណ៍ប្រយុទ្ធទៅនឹងជំងឺគ្រុនចាញ់ជាបន្តបន្ទាប់ ទីបំផុតស្ថានភាពជំងឺគ្រុនចាញ់ត្រូវបានធ្លាក់ចុះ មកនៅទាបបំផុត ជាពិសេសក្នុងបំណាច់ឆ្នាំ២០២០កន្លងមកនេះ គឺនៅសល់អ្នកកើតជំងឺគ្រុនចាញ់ ត្រឹមតែ៨២២២នាក់។ នេះជាលទ្ធផលដ៏ជោគជ័យធំធេងណាស់ ដែលបានទម្លាក់ស្ថានភាពជំងឺគ្រុនចាញ់។ ដោយឡែកករណីស្លាប់ ក្នុងប្រទេសកម្ពុជាយើង ត្រូវបានបញ្ឈប់លែងមានករណីស្លាប់ដោយសារជំងឺគ្រុនចាញ់ តាំងពីឆ្នាំ២០១៨មកម្លេះ។ ដូច្នេះបើយើងក្រឡេកមើលករណីជំងឺគ្រុនចាញ់ ក្នុងរយៈពេល១០ខែ ឆ្នាំ២០២១នេះ ស្ថិតក្នុងអន្តរកាលកូវីដ-១៩វិញ យើងឃើញថាជំងឺគ្រុនចាញ់បានបន្តចុះទៀត ប្រមាណជា៥៧% បើប្រៀបធៀបទៅនឹងរយៈពេលដូចគ្នា រយៈពេល១០ខែ ក្នុងឆ្នាំ២០២០ គឺនៅក្នុងឆ្នាំ២០២១នេះ យើងនៅសល់តែជាង៣៥០០ករណីនោះទេ ហើយចំពោះករណីស្លាប់មិនមាននោះទេ ដោយយើងទទួលបានសូចនាករជោគជ័យ០៣ឆ្នាំមុនផែនការគ្រោងទុករួចជាស្រេច។ ទន្ទឹមនឹងនោះអ្វីដែលជាការកត់សម្គាល់ផលវិជ្ជមាននៃការវិវត្តន៍លើសមិទ្ធផលនោះ គឺហៅថាគ្រុនចាញ់ប្រភេទសន្ធំ ឬប្រភេទហ្វាស៊ីបារ៉ូម ដែលក្នុងរយៈពេល១០ខែ ឆ្នាំ២០២១នេះ មានចំនួន២២៦ករណី គឺស្មើនឹង៦% នៃជំងឺគ្រុនចាញ់សរុបក្នុងរយៈពេល១០ខែ នៅក្នុងឆ្នាំ២០២១។ ដូច្នេះករណីជំងឺគ្រុនចាញ់ប្រភេទសន្ធំនេះ បន្តទាបជាងឆ្នាំ២០២០ ក្នុងរយៈពេលដូចគ្នា ដែលមានចំនួន ៧៩៤ ករណីនេះជាចំនុចវិជ្ជមាន និងមោទនភាពណាស់សម្រាប់ប្រទេសកម្ពុជាយើង។

និយាយដោយឡែកជំងឺគ្រុនចាញ់នៅក្នុងប្រទេសកម្ពុជា យើងមានគោលដៅគន្លឹះចំនួន០៣៖ គោលដៅគន្លឹះទី១. ទប់ស្កាត់លែងឲ្យមានភាពស៊ាំថ្នាំព្យាបាលជំងឺគ្រុនចាញ់ (បានន័យថាលែងឲ្យមានភាពស៊ាំថ្នាំសម្លាប់មេរោគគ្រុនចាញ់)។ គោលដៅគន្លឹះទី២.ធ្វើយ៉ាងណាឈានទៅលុបបំបាត់ឲ្យបាននូវប្រភេទជំងឺគ្រុនចាញ់សន្ធំ ដែលជាប្រភេទជំងឺគ្រុនចាញ់ធ្វើឲ្យបងប្អូនប្រជាពលរដ្ឋស្លាប់ គឺយើងបានចងក្រងនូវសូចនាករ ចំនួន០២ ដែលសូចនាករទី១ គឺទប់ ឬក៏បញ្ឈប់លែងឲ្យមានករណីស្លាប់ដោយសារជំងឺគ្រុនចាញនៅឆ្នាំ២០២០ និងសូចនាករទី២ យើងនឹងលែងឲ្យមានករណីឈឺនាចុងឆ្នាំ២០២៣ ដើម្បីបញ្ឈប់ករណីស្លាប់នាឆ្នាំ២០២៣និង គោលដៅគន្លឹះទី៣. គឺជាគោលដៅគន្លឹះនៅក្នុងឆ្នាំ២០២៥ បានន័យថាធ្វើយ៉ាងណាឲ្យជំងឺគ្រុនចាញ់គ្រប់ទម្រង់ ទាំងហ្វាស៊ីបារ៉ូម ឬក៏សន្ធំ ទាំងវីវ៉ាក់ជាទម្រង់គ្រុនចាញ់លាប់ ឬក៏គ្រុនចាញ់លាយចូលគ្នា ដែលហៅថាគ្រុនចាញ់ម៉ិច លែងឲ្យមានទាំងអស់ នៅក្នុងឆ្នាំ២០២៥។

ជាចុងក្រោយលោកវេជ្ជបណ្ឌិត ហ៊ុយ រ៉េកុល បានបញ្ជាក់ទៀតថា បើទោះបីយើងកំពុងរស់នៅក្នុងកាលៈទេសៈដ៏លំបាកនេះ ក៏ប៉ុន្តែយើងត្រូវតែរៀនរស់តាមបែបគន្លងថ្មី ដែលយើងបានទទួលនូវអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ព្រោះថាការរស់នៅតាមបែបគន្លងថ្មីនេះ គឺយើងនៅតែបន្តសម្រេចបានជោគជ័យនឹងប្រសិទ្ធភាពការងារ។ ក្នុងនាមមន្រី្តបច្ចេកទេស នៅតែសង្ឃឹមយ៉ាងមុតមាំថា ប្រសិនបើយើងនៅតែធានាបាននៅការប្តេជ្ញាចិត្តមួយដ៏ខ្ពស់ ដែលទទួលខុសត្រូវខ្ពស់ និងស្វែងយល់ឲ្យបានច្បាស់អំពីស្ថានភាពជំងឺគ្រុនចាញ់ តាមភូមិសាស្រ្តនីមួយៗ ហើយយើងបន្តគាំទ្រចូលរួមអនុវត្តន៍តាមការណែនាំក្នុងយុទ្ធសាស្រ្តជាតិលុបបំបាត់ជំងឺគ្រុនចាញ់ គឺយើងនឹងធានាថាឈានទៅដល់ជោគជ័យ១០០% ក្នុងការលុបបំបាត់ជំងឺគ្រុនចាញ់នាឆ្នាំ២០២៥៕អត្ថបទ ៖ រដ្ឋា