ប្រភពឧស្សាហកម្មមួយ នៅថ្ងៃពុធ (ទី៥ ខែកុម្ភៈ) នេះ បានប្រាប់សារព័ត៌មាន Reuters ថា សភារបស់ប្រទេសអ៊ុយក្រែន ត្រូវបានគេរំពឹងថា នឹងបោះឆ្នោតនៅសប្តាហ៍ក្រោយ ពាក់ព័ន្ធនឹងច្បាប់ដែលត្រូវការជាចាំបាច់ ដើម្បីសាង និងចាប់ផ្តើមម៉ាស៊ីនថាមពលនុយក្លេអ៊ែរថ្មីចំនួន ២គ្រឿង ជាវិធានការដែលនឹងជួយគាំទ្រប្រទេស ខណៈដែលប្រព័ន្ធថាមពលរបស់ខ្លួន ស្ថិតក្រោមគោលដៅវាយប្រហារជាញឹកញាប់ដោយមីស៊ីលរបស់រុស្ស៊ី។

មន្ត្រីថាមពលអ៊ុយក្រែន បានប្រាប់ថា រ៉េអាក់ទ័រថ្មីនេះ នឹងត្រូវសាងសង់នៅឯរោងចក្រថាមពលនុយក្លេអ៊ែរ Khmelnytskyi នៅភាគខាងលិចប្រទេសអ៊ុយក្រែន និងបំពាក់ដោយឧបករណ៍បង្កើតឡើងដោយប្រទេសរុស្ស៊ី ដែលទីក្រុងគីវចង់នាំចូលពីប្រទេសប៊ុលហ្គារី។

គួរបញ្ជាក់ថា កាលពីខែមិថុនាឆ្នាំមុន អ៊ុយក្រែនបានគ្រោងចុះហត្ថលេខាលើកិច្ចព្រមព្រៀងទិញតួម៉ាស៊ីននុយក្លេអ៊ែរចំនួន ២គ្រឿង ពីប៊ុលហ្គារី ដើម្បីយកមកប៉ះប៉ូវរោងចក្រថាមពលនុយក្លេអ៊ែរដែលត្រូវបានកាន់កាប់ដោយរុស្ស៊ី គឺ Zaporizhzhia ដែលមានរ៉េអាក់ទ័រចំនួន ៦គ្រឿង ប៉ុន្តែមិនអាចធ្វើដូច្នេះបាន ដោយសារតែខ្វះច្បាប់ ដើម្បីបើកផ្លូវឲ្យមានវិធានការបែបនេះ។

ច្បាប់ថ្មីនេះ ត្រូវបានជំទាស់ដោយសមាជិកសភាមួយចំនួន ដែលបានលើកឡើងថា ការចំណាយច្រើនលើការប៉ាន់ស្មានពីតម្លៃសាងសង់ ក្នុងបរិបទពេលមានសង្រ្គាមជាមួយរុស្ស៊ីបែបនេះ មិនមានតម្លាភាពនោះទេ៕