​ចិន៖ ប្រធានាធិបតី​ចិនលោក Xi Jinping បាន​និយាយ​កាលពី​ថ្ងៃ​សុក្រ​ថា ប្រទេស​ចិន​នឹង​ពង្រីក​ការ​បើកចំហ​ដោយ​ឥត​ឈប់ឈរ និង​ចែករំលែក​ឱកាស​អភិវឌ្ឍន៍​របស់​ខ្លួនជាមួយ​សមាជិក ​APEC ​និង​ពិភពលោក​កាន់តែ​ទូលំទូលាយ​។ លោក Xi Jinping បាន​លើកឡើងដូច្នេះ​នៅ​ពេល​ថ្លែង​សុន្ទរកថា​នៅ​ក្នុង​កិច្ចប្រជុំ​មេដឹកនាំ​សេដ្ឋកិច្ច​អាស៊ី​-​ប៉ាស៊ីហ្វិក (APEC) លើក​ទី២៨ នៅ​ទីក្រុង​ប៉េកាំង​តាមរយៈ​បណ្ដាញ​វីដេអូ​។

លោក​និយាយ​ថា ឆ្នាំ​នេះ​ជា​ខួប​លើក​ទី១០០ នៃ​ការ​បង្កើត​បក្ស​កុម្មុយនិស្ត​ចិន ​(CPC)​។ វា​គឺជា​គោលដៅ​ដែល​មិន​ផ្លាស់ប្ដូរ​របស់​បក្ស​កុម្មុយនិស្ត​ចិន ក្នុង​ការ​ផ្តល់​នូវ​ជីវិត​កាន់តែ​ប្រសើរ​ឡើង​សម្រាប់​ប្រជាជន​ចិន​ជាង ១.៤​ពាន់​លាន​នាក់ និង​ដើម្បី​ធ្វើ​ឲ្យ​ប្រសើរ​ឡើង​សន្តិភាព និង​ការ​អភិវឌ្ឍន៍​សម្រាប់​មនុស្សជាតិ​។ ពេលនេះ​ប្រទេស​ចិនបាន​ចាប់ផ្ដើម​ដំណើរ​ថ្មី ​ឆ្ពោះ​ទៅ​រក​ការកសាង​ប្រទេស​សង្គមនិយម​ទំនើប​យ៉ាង​ពេញលេញ​។ លោក Xi បាន​និយាយ​ថា ប្រទេសចិន​នឹង​ពង្រីក​ការ​បើកចំហ​ដោយ​មិន​ងាករេ ហើយ​ចែករំលែក​ឱកាសអភិវឌ្ឍន៍​របស់​ខ្លួនជាមួយ​សមាជិក APEC និង​ពិភពលោក​កាន់តែ​ទូលំទូលាយ​។​

​ប្រធានាធិបតី​ចិនលោក Xi Jinping បាន​និយាយ​ថា ដើម្បី​បំបាត់​ជំងឺ​រាតត្បាត COVID-19 និង​ស្ដារ​កំណើន​សេដ្ឋកិច្ច​ឡើង​វិញ នៅ​ដើមដំបូង​គឺជា​អាទិភាព​កំពូល​សម្រាប់​សេដ្ឋកិច្ច APEC​ នៅ​ពេល​នេះ​។ យើង​ត្រូវ​អនុវត្ត​តាម​វិធីសាស្ត្រ​ដែល​ផ្អែកលើ​វិទ្យាសាស្ត្រក្នុងការ​ឆ្លើយតប​ទៅ​នឹង​ជំងឺ​រាតត្បាត ធ្វើ​ឲ្យ​ប្រសើរ​ឡើង​កិច្ច​សហប្រតិបត្តិការ​អន្តរជាតិ និងជំរុញ​ការស្រាវជ្រាវ​ការអភិវឌ្ឍន៍ ការផលិត និង​ការចែកចាយ​វ៉ាក់សាំង​ដោយ​យុត្តិធម៌​៕

អត្ថបទ៖ ប៊ុនថន