ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ (ថ្នាក់ជាតិ) ឆ្នាំ២០២៤/២៥ បានរកឃើញបេក្ខភាពឡើងវគ្គ ៨ក្រុមចុងក្រោយ ឬវគ្គ ១/៤ផ្ដាច់ព្រ័ត្រចំនួន ២ក្រុមទៀត រួមមានក្រុមភ្នំពេញក្រោន និងសមាគមកីឡាបាល់ទាត់កងយោធពលខេមរភូមិន្ទ(Tiffy Army) គ្រាដែលអង្គរថាយហ្គឺរ បានត្រឹមខកចិត្ត ក្រោយធ្លាក់ត្រឹមវគ្គជម្រុះដំបូង ។

សម្រាប់ភ្នំពេញក្រោន គឺបានបន្ដយកឈ្នះក្រុមឈើតុំខេត្តពោធ៍សាត់ ៧-០ លើទឹកដីរបស់ខ្លួន ក្រោយយកឈ្នះក្រៅដី ២-០ កាលពីជើងទី១ ។ សម្រាប់គ្រាប់បាល់ជ័យជម្នះ ក្នុងជំនួបជើងទី២ នៅកីឡដ្ឋាន ស្មាត អរអេសអ៊ិន កាលពីរាត្រីថ្ងៃទី០៥ ខែកុម្ភៈនេះ ធ្វើសម្រេចដោយកីឡាករ Andres Nieto ៣គ្រាប់ និងមិត្ដរួមក្រុម ឡុង ភារ៉ាត់, Yudai Ogawa, ឈិន វីននីន និង Jelle Goselink ម្នាក់ ១គ្រាប់ ។

ជ័យជម្នះនេះ នាំឲ្យភ្នំពេញក្រោន ឡើងទៅវគ្គ ៨ក្រុមចុងក្រោយ ដោយឈរចាំក្រុមឈ្នះ រវាងក្រុមណាហ្គាវើលដ៏ និងសមាគមកីឡាបាល់ទាត់ក្រសួងមហាផ្ទៃ ដែលគ្រោងធ្វើការប្រកួតកាត់សេចក្ដីជើងទី២ នាពេលឆាប់ៗខាងមុខ បន្ទាប់ពីជើងទី១ ណាហ្គាវើលដ៏ បានទទួលជ័យជម្នះក្រៅដី ១-០ ។

ចំណែកក្រុមកងយោធពលខេមរភូមិន្ទ គឺបានផ្ដល់ការខកចិត្តដល់ក្រុមអង្គរថាយហ្គឺរ ក្រោយបញ្ចប់ការប្រកួតជើងទី២ ស្មើគ្នា ៣-៣ នៅកីឡដ្ឋានស្ដាតចាស់ កាលពីរាត្រីថ្ងៃពុធជាមួយគ្នា ។ ជំនួបរវាងក្រុមសមាជិកលីគកំពូលនេះ ពិតជាមានភាពស្វិតស្វាញខ្លាំង បន្ទាប់ពីក្រុមម្ចាស់ផ្ទះបើកការនាំមុខ ២គ្រាប់មុន នៅវគ្គទី១ ដោយកីឡាករ ជុង សាណាត និង ខន ណារ៉ង់ អង្គរថាយហ្គឺរ ក៏បានព្យាយាមវាយបកជាខ្លាំង នៅវគ្គទី២ រហូតរកបាន ៣គ្រាប់វិញ ដោយកីឡាករ Pedro Joao ម្នាក់ឯង នៅនាទី៥០, ៥១ និងនាទី៧៧ ។

ដោយសារផសគ្រាប់បាល់ នៅតែចាញ់កងយោធពលខេមរភូមិន្ទ បន្ទាប់ពីបរាជ័យក្នុងដី ៣-០ កាលពីជើងទី១ អង្គរថាយហ្គឺរ នៅតែបន្ដវាយសម្រុករកគ្រាប់បាល់បន្ថែម តែធ្វើមិនបានសម្រេច ផ្ទុយទៅវិញ ត្រូវបានកីឡាករ ជុង សាណាត បន្ថែមគ្រាប់ទី៣ ឲ្យក្រុមម្ចាស់ផ្ទះតាមស្មើ នៅនាទី៩០+៤ ហើយបានរក្សាដល់ចប់ការប្រកួតពេញម៉ោង ។ សរុបទាំង ២ជើង កងយោធពលខេមរភូមិន្ទ ឈ្នះអង្គរថាយហ្គឺរ ៦-៣ ដើម្បីឡើងទៅវគ្គ ៨ក្រុមចុងក្រោយ ។

សម្រាប់វគ្គបន្ដ អតីតក្រុមជើងឯក ៣សម័យ សមាគមកីឡាបាល់ទាត់កងយោធពលខេមរភូមិន្ទ គឺត្រូវឈរចាំក្រុមឈ្នះ រវាងក្រុមវិសាខា និងក្រុមឡាយអ៊ិនឃីងខេត្តសៀមរាប ដែលនឹងត្រូវប្រកួតកាត់សេចក្ដីជើងទី២ នាល្ងាចថ្ងៃទី០៦ ខែកុម្ភៈនេះ បន្ទាប់ពីជើងទី១ វិសាខា បានយកឈ្នះក្រុមមានមូលដ្ឋាននៅខេត្តសៀមរាប ៣-០ ក្រៅដី ។ រីឯអង្គរថាយហ្គឺរ ដែលបានដាក់គោលដៅដណ្ដើមកៅអី Top-4 លើកដំបូង ធ្វើមិនបានសម្រេចឡើយ ដោយបានធ្លាក់ត្រឹមវគ្គ ១៦ក្រុមចុងក្រោយប៉ុណ្ណោះ ។

គួរដឹងថា បច្ចុប្បន្នពានរង្វាន់សម្ដេចតេជោ ហ៊ុន សែន-ថ្នាក់ជាតិ ឆ្នាំ២០២៤/២៥ គឺបានរកឃើញបេក្ខភាពឡើងវគ្គ ៨ក្រុមចុងក្រោយចំនួន ៣ក្រុមហើយ គ្រាដែល ១ក្រុមទៀត គឺក្រុមបឹងកេត ដែលបានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ចាម ១៦-១ ៕អត្ថបទ លី ឈុនឡា