បាតុកររាប់រយនាក់ រួមទាំងសមាជិកព្រឹទ្ធសភា និងអ្នកតំណាងសហរដ្ឋអាមេរិក បានធ្វើការតវ៉ា កាលពីថ្ងៃពុធ ទី៥ ខែកុម្ភៈ នៅខាងក្រៅវិមានកាពីតូលសហរដ្ឋអាមេរិក ប្រឆាំងប្រធានាធិបតីសហរដ្ឋអាមេរិក លោក Donald Trump និងទីប្រឹក្សា លោក Elon Musk។

ការតវ៉ានេះ ផ្តោតសំខាន់លើការសម្រេចចិត្តរបស់រដ្ឋបាលក្នុងការដាក់ឲ្យបុគ្គលិកដែលបានជួលដោយផ្ទាល់ទាំងអស់របស់ទីភ្នាក់ងារសហរដ្ឋអាមេរិកសម្រាប់ទីភ្នាក់ងារការអភិវឌ្ឍន៍អន្តរជាតិ (USAID) ឱ្យឈប់សម្រាកនៅទូទាំងពិភពលោក និងបានហៅបុគ្គលិករាប់ពាន់នាក់ដែលបម្រើការនៅបរទេស មកវិញ។

ក្រុមអ្នកតវ៉ា បានស្រែកដោយអំពាវនាវឱ្យលោក Musk ចាកចេញពីរដ្ឋបាលនេះ។ សមាជិកព្រឹទ្ធសភាអាមេរិក រួមទាំងលោក Chris Van Hollen មកពីរដ្ឋ Maryland និងលោក Corey Booker មកពីរដ្ឋ New Jersey បានប្រមូលផ្តុំអ្នកគាំទ្រ ដោយដាក់ចេញនូវផែនការសម្រាប់បញ្ហាប្រឈមផ្លូវច្បាប់ និងអំពាវនាវឱ្យក្រុមបាតុករបន្តនិយាយគាំទ្រ ទីភ្នាក់ងារ USAID ។

យោងតាមអង្គភាពសេវាស្រាវជ្រាវសភា (CRS) បានឱ្យដឹងថា កម្លាំងការងាររបស់ទីភ្នាក់ងារ USAID មានចំនួនច្រើនជាង១០.០០០នាក់ ដោយប្រហែល២ភាគ៣ នៃបុគ្គលិកនោះបម្រើការនៅបរទេស។ ទីភ្នាក់ងារនេះមានបេសកកម្មនៅជាង៦០ប្រទេសនិងតំបន់។

សេចក្តីប្រកាស បាននិយាយថា សម្រាប់បុគ្គលិករបស់ទីភ្នាក់ងារ USAID នៅក្រៅប្រទេស ទីក្រុងវ៉ាស៊ីនតោនកំពុងរៀបចំផែនការមួយក្នុងការសម្របសម្រួលជាមួយក្រសួងការបរទេស ហើយនឹងចំណាយសម្រាប់ការធ្វើដំណើរត្រឡប់របស់បុគ្គលិកទៅកាន់សហរដ្ឋអាមេរិកវិញ ក្នុងរយៈពេល៣០ថ្ងៃ។