មន្ត្រី បាននិយាយកាលពីថ្ងៃពុធថា ភ្លៀងធ្លាក់ខ្លាំងនៅក្នុងប្រទេសបូលីវី បានបណ្តាលឲ្យមនុស្ស ២៣នាក់ស្លាប់ចាប់តាំងពីខែវិច្ឆិកា ឆ្នាំមុន និងបានជម្លៀសប្រជាជនជាង១០៩.០០០គ្រួសារ នៅក្នុងតំបន់ចំនួន៨ក្នុងចំណោមតំបន់ចំនួន៩ របស់ប្រទេស។

អនុរដ្ឋមន្ត្រីក្រសួងការពារជនស៊ីវិល លោក Juan Carlos Calvimontes បាននិយាយក្នុងសន្និសីទសារព័ត៌មានថា កាលពីសប្តាហ៍មុនតែមួយ ចំនួនអ្នកស្លាប់បានកើនឡើងពី១៩នាក់ ដល់២៣នាក់ ដោយសារតែទឹកជំនន់នៅក្នុងតំបន់មួយចំនួន ហើយមនុស្សពីរនាក់ បានបាត់ខ្លួន។

ក្នុងសប្តាហ៍កន្លងទៅ គ្រួសារជាច្រើន ត្រូវបានបង្ខំឲ្យជម្លៀសចេញពីលំនៅឋានរបស់ពួកគេ ឬត្រូវបានរងផលប៉ះពាល់ដោយទឹកជំនន់ បានកើនឡើងពី ៨៤.០២៩គ្រួសារ ដល់១០៩.១៥៦គ្រួសារ ដែលបង្ហាញពីទំហំនៃគ្រោះមហន្តរាយធម្មជាតិ។

លោកអនុរដ្ឋមន្ត្រី បាននិយាយថា ចាប់តាំងពីខែវិច្ឆិកា មក ក្រុងចំនួន៧៦ក្រុង និងសហគមន៍ចំនួន១.៣១៤ បានរងផលប៉ះពាល់ ដោយលំនៅឋានចំនួន៦៥២ ខ្នង បានរងការខូចខាត ក្នុងនោះ ៣៣២ខ្នង ត្រូវបានបំផ្លាញទាំងស្រុង ខណៈភ្លៀងនៅបន្តធ្លាក់។