ចៅក្រមសហព័ន្ធទីពីរ បានចេញដីការារាំងរដ្ឋបាលរបស់លោក Donald Trump មិនឱ្យអនុវត្តផែនការរបស់លោកក្នុងការទប់ស្កាត់សិទ្ធិពលរដ្ឋពីកំណើតរបស់សហរដ្ឋអាមេរិក ដោយនិយាយថា ពុំមានតុលាការណាមួយក្នុងសហរដ្ឋអាមេរិក បានគាំទ្រការបកស្រាយរដ្ឋធម្មនុញ្ញរបស់ប្រធានាធិបតីមកពីបក្សសាធារណរដ្ឋរូបនេះទេ។

អំឡុងសវនាការកាលពីថ្ងៃពុធ (០៥ កុម្ភៈ) នៅក្រុង Greenbelt រដ្ឋ Maryland ចៅក្រមប្រចាំតំបន់អាមេរិក លោកស្រី Deborah Boardman បានគាំទ្រក្រុមសិទ្ធិជនអន្តោប្រវេសន៍ពីរក្រុម និងស្ត្រីមានផ្ទៃពោះ ៥នាក់ ដែលបានប្រកែកថា កូនៗរបស់ពួកគេជួបហានិភ័យនៃការបដិសេធសញ្ជាតិអាមេរិក ដោយផ្អែកលើស្ថានភាពអន្តោប្រវេសន៍របស់ឪពុកម្តាយ ដែលនោះជាការបំពានរដ្ឋធម្មនុញ្ញ។

លោកស្រី Boardman ដែលជាមន្រ្តីតែងតាំងដោយលោកអតីតប្រធានាធិបតី Joe Biden បានចេញដីកាបឋមមួយដល់ទូទាំងប្រទេស ដែលរារាំងបទបញ្ជារបស់លោក Trump មិនឱ្យចូលជាធរមានដូចដែលបានគ្រោងទុកនៅថ្ងៃទី១៩ ខែកុម្ភៈ ខណៈពេលបញ្ហាកំពុងដំណើរការតាមនីតិវិធី។

មេធាវីរបស់ក្រសួងយុត្តិធម៌អាមេរិក បានស្នើសុំឱ្យលោកស្រី Boardman ផ្ដល់ពេល ៦០ថ្ងៃដើម្បីឆ្លើយតបទៅនឹងដីកានេះ ប៉ុន្តែមិនបាននិយាយថា តើរដ្ឋបាលលោក Trump នឹងប្តឹងឧទ្ធរណ៍ ឬយ៉ាងណាទេ។

គួរបញ្ជាក់ថា ក្រឹត្យរបស់លោក Trump បានបញ្ជាឱ្យភ្នាក់ងារអាមេរិក បដិសេធមិនទទួលស្គាល់សញ្ជាតិរបស់កុមារដែលកើតនៅក្នុងទឹកដីអាមេរិក ប្រសិនបើទាំងម្តាយ និងឪពុករបស់ពួកគេមិនមែនជាពលរដ្ឋអាមេរិក ឬជាអ្នករស់នៅដោយអចិន្ត្រៃយ៍ស្របច្បាប់ទេនោះ៕