ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ បានមានប្រសាសន៍បញ្ជាក់នៅលើបណ្ដាញសង្គមហ្វេសប៊ុកថា លោក លោកស្រី នាយក នាយករងវិទ្យាល័យ មត្តេយ្យសិក្សា ចំនួន១០ និងប្រធាន អនុប្រធានមន្ទីរពេទ្យ ព្រមទាំងសហការី ចំនួន១៥ អង្គភាព បានធ្វើបទបង្ហាញ ក្នុងនាមជាបេក្ខភាពអង្គភាពផ្តល់សេវាសាធារណៈគំរូ ដែលមានលំដាប់ពិន្ទុខ្ពស់ ជូនគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.រ.) នៅរាជធានីភ្នំពេញ ចាប់ពីថ្ងៃទី៣ ដល់ថ្ងៃទី៥ ខែកុម្ភៈ ឆ្នាំ២០២៥។ 

ឯកឧត្តម ឧបនាយករដ្ឋមន្ត្រី មានប្រសាសន៍ថា រយៈពេល៣ថ្ងៃ គណៈកម្មការ គ.វ.ជ. ដែលដឹកនាំដោយ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគ.វ.ជ. បានស្តាប់បទបង្ហាញទាំងនេះយ៉ាងយកចិត្តទុកដាក់ សួរសំណួរដេញដោលយ៉ាងផុលផុស ដើម្បីដាក់ពិន្ទុស្វែងរកជ័យលាភីចុងក្រោយ ប្រកបដោយសុក្រឹតភាពជាទីបំផុត។ ទម្រាំបានឈានមកដល់ដំណាក់កាលនៃការធ្វើបទបង្ហាញចុងក្រោយនេះ អង្គភាពទាំង២៥ បានឆ្លងកាត់ការប្រកួតប្រជែង និងជ្រើសសម្រាំងជាមួយអង្គភាពផ្សេងៗទូទាំងប្រទេសសរុបចំនួន ១០៤៧អង្គភាព (វិស័យអប់រំ ចំនួន៩២៨ និងវិស័យសុខាភិបាល ចំនួន១១៩) ចំនួន៣កម្រិត ពោលគឺ កម្រិតក្រុង ស្រុក ខណ្ឌ, កម្រិតរាជធានី ខេត្ត និងកម្រិតថ្នាក់ជាតិ។ 

ឯកឧត្តមបានថ្លែងថា តាមរយៈបទបង្ហាញនីមួយៗ ក្រៅពីការរៀបរាប់អំពីទិដ្ឋភាពបច្ចេកទេស ក្នុងការបម្រើសេវាជូនប្រជាពលរដ្ឋ ដែលមានដូចជាការផ្តល់ព័ត៌មាន ការរៀបចំហេដ្ឋារចនាសម្ព័ន្ធ មេត្រីភាពបរិស្ថាន ការបំពេញវិជ្ជាជីវៈប្រកបដោយក្រមសីលធម៌ និងចំណុចផ្សេងៗជាច្រើនទៀតរាប់រយផ្ទាំងបង្ហាញ (Slides) ថ្នាក់ដឹកនាំអង្គភាពនីមួយៗ បានផុសចេញនូវទឹកចិត្តបម្រើប្រជាជន ប្រកបដោយឧត្តមភាពជាមន្ត្រីរាជការ។ ភាសាបេះដូងជាច្រើនត្រូវបានលើកឡើងថា៖ “យកបេះដូង ដើម្បីបម្រើរាស្រ្ត” [...] “មិនអាចទុកប្រជាពលរដ្ឋណាមួយចោលទេ” [...] “អ្នកជំងឺស្ថិតក្នុងបេះដូងយើង” [...] “មន្ទីរពេទ្យផ្តល់សេវាល្អ ជាក្តីត្រេកអររបស់ប្រជាជន” [...] “បំពេញដោយមិនទាមទារ ជាមាគ៌ានាំមកនូវក្តីសុខ” [...] “យើងមានចក្ខុវិស័យរួម និងបេះដូងរួមគ្នា” [...] “សុខទុក្ខរបស់អ្នកជំងឺ ជាសុខទុក្ខរបស់គ្រូពេទ្យ” [...] “គ្រប់អ្នកជំងឺ ត្រូវចាត់ទុកជាសាច់ឈាម បេះដូងយើង” [...]។ល។ 

បើតាម ឯកឧត្តម ហ៊ុន ម៉ានី ឧបនាយករដ្ឋមន្ត្រី ប្រយោគភាសាទាំងអស់នេះ បានផុសចេញដោយស្មោះស្ម័គ្រនៅក្នុងបទបង្ហាញនីមួយៗ ដែលជាទឹកចិត្តក្នុងការយកបេះដូងមកបម្រើប្រជាជន ដើម្បីទទួលបានទំនុកចិត្ត ក្តីស្រឡាញ់ពីប្រជាជន ឆ្ពោះទៅការរីកចម្រើនក្នុងសហគមន៍ និងក្នុងសង្គមជាមួយគ្នា។ លោកប្រធានមន្ទីរពេទ្យមួយរូបបានលើកឡើងថា “នៅពេលដែលយើងផ្តល់សេវាល្អ ប្រជារាស្ត្រគាំទ្រ និងសប្បាយចិត្ត យើងនឹងទទួលបានផលជាមួយគ្នាដែរ។ [...] នៅពេលដែលយើងមានក្តីរីករាយសប្បាយចិត្ត មានសុខភាពល្អ មានអនាគតល្អ នោះយើងនឹងអាចចូលរួមអភិវឌ្ឍប្រទេសជាតិជាមួយគ្នា។” លោកប្រធានមន្ទីរពេទ្យបន្ថែម៕