អ៊ុយក្រែន៖ អ៊ុយក្រែនកំពុងពង្រឹងសន្តិសុខនៅតាមព្រំដែនរបស់ខ្លួនជាមួយប្រទេសបេឡារុស ដោយមានសមាជិកអង្គភាពសេវាកម្មបន្ថែម ៨.៥០០នាក់ត្រូវបានដាក់ពង្រាយដើម្បីការពារច្រកឆ្លងកាត់។ នគរបាលព្រំដែនបាននឹងកំពុងធ្វើសមយុទ្ធ ដើម្បីត្រៀមខ្លួនសម្រាប់ការប៉ះទង្គិចគ្នាដែលអាចកើតមានជាមួយជនអន្តោប្រវេសន៍នៅព្រំដែនបេឡារុស។
យោងតាមរដ្ឋមន្ត្រីក្រសួងមហាផ្ទៃលោក Denys Monastyrsky បាននិយាយថា ឧទ្ធម្ភាគចក្ររហូតដល់ ១៥គ្រឿងនឹងធ្វើការហោះចល័ត និងផ្ទេរកងកម្លាំងទៅកាន់ព្រំដែនប្រសិនបើចាំបាច់។ ទន្ទឹមនឹងនេះ អង្គភាពសេវាឆ្មាំព្រំដែនរដ្ឋរបស់ប្រទេសបានរាយការណ៍ថា ជនអន្តោប្រវេសន៍ ៤នាក់មកពីប្រទេសឥណ្ឌាត្រូវបានឃុំខ្លួននៅភាគខាងលិចប្រទេសអ៊ុយក្រែន ជិតព្រំដែនសហភាពអឺរ៉ុបកាលពីថ្ងៃព្រហស្បតិ៍។ អ្នកស្វែងរកសិទ្ធិជ្រកកោនរាប់ពាន់នាក់បានត្រៀម ចូលទៅក្នុងប្រទេសសមាជិកសហភាពអឺរ៉ុបមានប្រទេសប៉ូឡូញ លីទុយអានី និងឡាតវី ចាប់តាំងពីរដូវក្តៅពីប្រទេសបេឡារុស ទោះបីជាមនុស្សជាច្រើនផ្សេងទៀតត្រូវបានរារាំងមិនឱ្យចូល ឬរុញត្រឡប់ទៅវិញក៏ដោយ។
វិបត្តិពាក់ព័ន្ធទៅនឹងជនអន្តោប្រវេសន៍មួយចំនួនធំដែលជាប់គាំងនៅព្រំដែនសហភាពអឺរ៉ុប គំរាមក្លាយជាវិបត្តិមនុស្សធម៌នៅពេលដែលរដូវរងាខិតជិតមកដល់ ហើយក៏កំពុងបង្កើតរឿងរ៉ាវមួយផ្សេងទៀតនៃភាពតានតឹង រវាងរបបផ្តាច់ការប្រទេសលោកខាងលិច និងប្រទេសបេឡារុស។ ក្នុងចំណោមជនអន្តោប្រវេសន៍មានជនជាតិឃឺដអ៊ីរ៉ាក់ និងស៊ីរីដែលភៀសខ្លួនចេញពីជម្លោះ ការធ្វើទុក្ខបុកម្នេញ ឬភាពក្រីក្រ។ មនុស្សជាច្រើនមានបំណងទៅកាន់ប្រទេសអាឡឺម៉ង់ ឬបណ្តាប្រទេសអឺរ៉ុបខាងលិចផ្សេងទៀត និងដើម្បីទៅជួបជុំជាមួយសាច់ញាតិដែលបានតាំងទីលំនៅនៅទីនោះរួចហើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
