ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា រដ្ឋមន្ត្រីការពារជាតិអ៊ីស្រាអែល លោក Israel Katz នៅថ្ងៃព្រហស្បតិ៍ (ទី៦ ខែកុម្ភៈ) នេះ បានបញ្ជាឲ្យកងទ័ពរៀបចំផែនការត្រៀម ដើម្បីអនុញ្ញាតឲ្យ «មានការចាកចេញដោយស្ម័គ្រចិត្ត» របស់អ្នកស្រុកពីតំបន់ហ្កាហ្សា។

សេចក្ដីណែនាំនេះ បានកើតមានឡើងបន្ទាប់ពីមានការប្រកាសដ៏គួរឲ្យភ្ញាក់ផ្អើលរបស់ប្រធានាធិបតីអាមេរិក លោក Donald Trump ដែលថា សហរដ្ឋអាមេរិកគ្រោងនឹងកាន់កាប់តំបន់ហ្កាហ្សា តាំងទីលំនៅថ្មីឲ្យពលរដ្ឋប៉ាឡេស្ទីនដែលរស់នៅទីនោះ និងប្រែក្លាយដែនដីនេះឲ្យទៅជា «Riviera of the Middle East» (តំបន់ស៊ីវិល័យនៃមជ្ឈិមបូព៌ា)។

ប្រព័ន្ធផ្សព្វផ្សាយ Channel 12 របស់អ៊ីស្រាអែល បានដកស្រង់សម្តីរបស់លោក Katz ដែលបាននិយាយថា៖ «ខ្ញុំសូមស្វាគមន៍ចំពោះផែនការដ៏អង់អាចរបស់ប្រធានាធិបតី លោក Trump។ ប្រជាជន នៅតំបន់ហ្កាហ្សា គួរតែត្រូវបានអនុញ្ញាតឲ្យចាកចេញ និងបម្លាស់លំនៅដោយសេរី ដូចបទដ្ឋានទូទៅរបស់ប្រជាជន នៅជុំវិញពិភពលោក។

នៅពេលត្រូវបានសួរថា តើអ្នកណា នឹងគ្រប់គ្រងពលរដ្ឋប៉ាឡេស្ទីន លោក Katz បានឆ្លើយថា វាគួរតែជាប្រទេសដែលបានប្រឆាំងនឹងប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា។

លោកបាននិយាយថា៖ "ប្រទេសនានា ដូចជាអេស្ប៉ាញ អៀរឡង់ ន័រវ៉ែស និងប្រទេសដទៃទៀត ដែលបានធ្វើការចោទប្រកាន់ និងការអះអាងមិនពិត មកលើអ៊ីស្រាអែល ជុំវិញវិធានការ នៅតំបន់ហ្កាហ្សា មានកាតព្វកិច្ចស្របច្បាប់ ក្នុងការអនុញ្ញាតឲ្យប្រជាជននៅតំបន់ហ្គាហ្សាណាម្នាក់ចូលទៅដែនដីរបស់ពួកគេ»។

ប្រព័ន្ធផ្សព្វផ្សាយ Channel 12 បានរាយការណ៍ថា ផែនការរបស់លោក Katz នឹងរួមបញ្ចូលជម្រើសនៃការចាកចេញតាមរយៈផ្លូវឆ្លងផ្លូវគោល ក៏ដូចជាការរៀបចំជាពិសេស សម្រាប់ការចេញដំណើរតាមផ្លូវទឹក និងផ្លូវអាកាសផងដែរ។

គួរបញ្ជាក់ថា លោក Trump បានបង្កឲ្យមានការរិះគន់ខ្លាំងៗ កាលពីថ្ងៃពុធ ពាក់ព័ន្ធនឹងផែនការរបស់លោក សម្រាប់តំបន់ហ្កាហ្សា ដោយមហាអំណាចពិភពលោក រុស្ស៊ី ចិន និងអាល្លឺម៉ង់ បានលើកឡើងថា ចំណាត់ការនោះ នឹងជំរុញ «មានការរងទុក្ខវេទនាថ្មី និងការស្អប់ខ្ពើមថ្មី»៕