ពិធីរំឭកខួប ត្រូវបានរៀបចំឡើងនៅតាមទីក្រុងជាច្រើននៅទូទាំងប្រទេសទួរគីនាថ្ងៃព្រហស្បតិ៍នេះ ដើម្បីរំឭកដល់វិញ្ញាណក្ខន្ធជនរងគ្រោះក្នុងការរញ្ជួយដីដែលបានសម្លាប់មនុស្សជាង ៥ម៉ឺននាក់ កាលពីរយៈពេល ២ឆ្នាំមុន ។

មនុស្សរាប់ពាន់នាក់ បានជួបជុំគ្នានៅទីក្រុងភាគកណ្តាលខេត្ត Hatay ដែលស្ថិតក្នុងចំណោមទីក្រុងរងការវាយប្រហារធ្ងន់ធ្ងរខ្លាំងបំផុតដោយសារការរញ្ជួយដី ដើម្បីដាក់កម្រងផ្កា បាច់ផ្កា នៅមុខស្តូបអនុស្សាវរីយ៍រំឭកដល់វិញ្ញាណក្ខន្ធជនរងគ្រោះ និងបានដង្ហែរក្បួនឆ្លងកាត់ដងផ្លូវ សូត្រពាក្យជាច្រើនដែលពួកគេមិនអាចបំភ្លេចបានអ្នកដែលបានបាត់បង់ជីវិតនៅក្នុងការរញ្ជួយដី ។ អ្នកខ្លះនាំគ្នាចោទប្រកាន់ការធ្វេសប្រហែសរបស់រដ្ឋាភិបាលទួរគី ។

ដងផ្លូវស្ងាត់ជ្រងំ ធុរកិច្ចបិទទ្វារ និងការងារស្តាឡើងវិញ នៅតែផ្តល់ជានិយមន័យដល់ទីក្រុង Hatay គឺជាទីក្រុងមួយស្ថិតនៅភាគខាងត្បូងទួរគី ដែលធ្លាប់ជាទីប្រមូលផ្តុំវប្បធម៌ចម្រុះបែប និងសាសនា ហើយនិងទាក់ទាញវិស័យទេសចរណ៍ ។

នៅទីក្រុង Adiyaman គឺជាទីក្រុងមួយទៀតដែលគេមើលឃើញការបំផ្លិចបំផ្លាញទ្រង់ទ្រាយធំ ដោយសារការរញ្ជួយដី មនុស្សរាប់ពាន់នាក់ នាំគ្នាដង្ហែរក្បួនឆ្លងកាត់ដងផ្លូវ និងជួបជុំគ្នានៅលើទីលានចតុរង្គ ដែលជាផ្នែកមួយនៃពិធីរំឭកខួប ។

រយៈពេល ២ឆ្នាំ ក្រោយការរញ្ជួយស្លាប់មនុស្ស និងបំផ្លិចបំផ្លាញខ្លាំងបំផុតក្នុងប្រវត្តិសាស្រ្តនាសម័យទំនើបរបស់ទួរគី មនុស្សរាប់ម៉ឺននាក់ នៅតែជម្លៀសខ្លួន ក្នុងនោះពួកគេមួយចំនួន បន្តរស់នៅក្នុងជំរំបណ្តោះអាសន្ន ស្របពេលកិច្ចខិតខំកសាងឡើងវិញ យឺតយ៉ាងជាងគោលដៅកំណត់ ។

សូមបញ្ជាក់ថា ការរញ្ជួយដីកម្រិត ៧,៨រ៉ិចទ័រ កាលពីថ្ងៃទី ៦ ខែកុម្ភៈ ឆ្នាំ ២០២៣ និងរលករញ្ជួយ បានអង្រួនខេត្តចំនួន ១១របស់ប្រទេសទួរគី និងតំបន់ភាគខាងជើងប្រទេសស៊ីរី ដោយបានសម្លាប់មនុស្សជាង ៥៥.០០០នាក់ និងមនុស្សជាង ១០៧.០០០នាក់ផ្សេងទៀត បានរងរបួស ។

គ្រោះមហន្តរាយនេះដែរ បានធ្វើឲ្យទីក្រុងទាំងមូលក្លាយជាគំនរបាក់បែក រួមទាំងផ្ទះសម្បែង មន្ទីរពេទ្យ និងអគារប្រវត្តិសាស្រ្ត ក្នុងនោះខេត្ត Hatay ទីក្រុង Kahramanmaras និងទីក្រុង Adiyaman រងផលប៉ះពាល់ខ្លាំងជាងគេបំផុត ៕