រូបភាពវីដេអូឃ្លីបពីសាក្សីម្នាក់នៅលើភ្នំ Isola ប្រទេសជប៉ុន ឃើញក្រុមភ្ញៀវទេសចរ និងក្រុមអ្នកជិះស្គី នាំគ្នាឡើងភ្នំដោយខ្លួនឯង ខណៈអ្នកខ្លះនាំគ្នាឈរតម្រង់ជួររង់ចាំយ៉ាងយូរ ដើម្បីជិះរថយន្តខ្សែកាបិ៍ ស្របពេលដែលព្រិលធ្លាក់ខ្លាំង ជំរុញឲ្យពួកគេធ្វើដំណើរទៅកាន់សណ្ឋាគារ ។

ដោយសារព្រិលធ្លាក់ខ្លាំង និងការតម្រង់ជួរយ៉ាងវែងរបស់ភ្ញៀវទេសចរ រង់ចាំជិះរថយន្តខ្សែកាបិ៍ មនុស្សមួយចំនួនបានសម្រេចចិត្តឡើងភ្នំ Isolaដោយខ្លួនឯង ទៅកាន់ជ្រលងភ្នំជិតរមណីយដ្ឋាន Rusutsu ស្ថិតក្នុងខេត្ត Hokkaido ជាទីដែលសណ្ឋាគារស្ថិតនៅ ។

កាលពីថ្ងៃពុធម្សិលមិញ ព្រិលយ៉ាងក្រាស់បណ្តាលមកពីខ្យល់ត្រជាក់ខ្លាំងបំផុតក្នុងរដូវនេះ បានគ្របណ្តប់បណ្តាទីក្រុងភាគខាងជើង និងតំបន់ឆ្នេរតាមសមុទ្ររបស់ប្រទេសជប៉ុន ។

យោងតាមការអះអាងរបស់ទីភ្នាក់ងារឧតុនិយមជប៉ុន បានឲ្យដឹងថា ព្រិលធ្លាក់បំបែកកំណត់ត្រាកម្រាស់ ១២៩សង់ទីម៉ែត្រត្រឹមរយៈពេល ១២ម៉ោង ត្រូវបានរកឃើញនៅក្នុងទីក្រុង Obihiro ខេត្ត Hokkaido ។

សំពាធខ្លាំងរដូវរងា ត្រូវបានគេព្យាករណ៍ថានឹងបន្តកើតមាន ហើយព្រិលធ្លាក់ខ្លាំង នឹងកើតមាននៅថ្ងៃព្រហស្បតិ៍នេះ នៅតាមតំបន់ជាច្រើន រួមទំាងតំបន់ភាគខាងលិច និងតំបន់ភាគខាងត្បូងប្រទេសជប៉ុន ។

ក្រុមមន្រ្តីឧតុនិយម បានជំរុញឲ្យប្រជាពលរដ្ឋមានការប្រុងប្រយ័ត្នខ្ពស់ចំពោះការអាក់ខានចរាចរណ៍ រលកសមុទ្រធំៗ និងការដាច់ចរន្តអគ្គិសនីជាដើម ៕