ក្រសួងការបរទេសចិន នៅថ្ងៃព្រហស្បតិ៍ (ទី៦ ខែកុម្ភៈ) នេះ បានប្រាប់ឲ្យដឹងថា ទីក្រុងប៉េកាំងប្រឆាំងនឹងការជំរុញរបស់ប្រធានាធិបតីអាមេរិកលោក Donald Trump ក្នុងការឲ្យយកប្រជាជនប៉ាឡេស្ទីនចេញពីតំបន់ហ្កាហ្សា ហើយឲ្យសហរដ្ឋអាមេរិកកាន់កាប់តំបន់នេះ ដោយគូសបញ្ជាក់ពីគោលជំហរដែលមានជាយូរមកហើយ ក្នុងការប្រឆាំងនឹងបម្លាស់លំនៅដោយបង្ខំ។

អំឡុងសន្និសីទសារព័ត៌មានដែលតែងធ្វើជាប្រចាំ អ្នកនាំពាក្យរបស់ក្រសួង លោក Guo Jiakun បាននិយាយថា ប្រទេសចិនគាំទ្រសិទ្ធិជាតិស្របច្បាប់របស់ប្រជាជនប៉ាឡេស្ទីន។

លោក Trump កាលពីថ្ងៃទី៤ ខែកុម្ភៈ បានស្នើឲ្យសហរដ្ឋអាមេរិកកាន់កាប់តំបន់ហ្កាហ្សា បន្ទាប់ពីលោកបានស្នើនៅមុននេះថា ប្រជាជនប៉ាឡេស្ទីន នៅក្នុងដែនដីនេះ គួរតែត្រូវបានផ្លាស់ទីលំនៅទៅកន្លែងផ្សេងជាអចិន្ត្រៃយ៍។ ហើយការអត្ថាធិប្បាយមុននេះរបស់លោក Trump ដែលថា ប្រជាជនប៉ាឡេស្ទីន គួរតែប្ដូរទៅរស់នៅក្នុងប្រទេសអេហ្ស៊ីប និងហ្ស៊កដានី ត្រូវបានច្រានចោលជាសាធារណៈ ដោយមេដឹកនាំប៉ាឡេស្ទីន និងអារ៉ាប់។

បណ្ដាមេដឹកនាំពិភពលោកផ្សេងទៀត បាននិយាយថា ពួកគេគាំទ្រអ្វីដែលគេហៅថា ដំណោះស្រាយរដ្ឋ២ ដែលមានរូបភាពរដ្ឋអ៊ីស្រាអែល និងប៉ាឡេស្ទីនជាមួយគ្នា។

ហើយអ្នកនាំពាក្យក្រសួងការបរទេសចិន លោក Guo បានបញ្ជាក់បន្ថែមថា ប្រទេសចិនបានត្រៀមខ្លួនជាស្រេច ក្នុងការធ្វើការជាមួយសហគមន៍អន្តរជាតិ ដើម្បីគាំទ្រដល់ដំណោះស្រាយរដ្ឋ២ ជាផ្លូវមូលដ្ឋានដ៏សំខាន់ ហើយជំរុញឲ្យមានការដោះស្រាយផ្នែកនយោបាយឲ្យបានឆាប់ និងយុត្តិធម៌ ចំពោះបញ្ហារបស់ប៉ាឡេស្ទីននេះ៕