ប្រជាពលរដ្ឋនៅក្នុងទីក្រុងដ៏តូច Myawaddy របស់សហភាពមីយ៉ាន់ម៉ា នៅជាប់ព្រំដែនជាមួយប្រទេសថៃ កំពុងរងផលប៉ះពាល់យ៉ាងខ្លាំង ដោយសារការសម្រេចរបស់រដ្ឋាភិបាលថៃ ក្នុងការកាត់ផ្តាច់ការផ្គត់ផ្គង់អគ្គិសនី អ៊ីនធឺណិត និងប្រេងឥន្ធនៈដល់ទីប្រជុំជននេះ កាលពីថ្ងៃពុធ (ទី៥ ខែកុម្ភៈ)។

គួរបញ្ជាក់ថា ចំណាត់ការបញ្ឈប់ការផ្គត់ផ្គងនេះ មានគោលបំណងរារាំងដល់ប្រតិបត្តិការរបស់មជ្ឈមណ្ឌលហៅទូរសព្ទឆបោករបស់ក្រុមអន្ធពាលមានមូលដ្ឋាននៅក្នុងតំបន់នេះ ដែលបានក្លាយជាកង្វល់សន្តិសុខអន្តរជាតិកាន់តែខ្លាំងឡើងៗ។

កាលពីថ្ងៃទី៥ ខែកុម្ភៈ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃថៃ លោក Anutin Charnvirakul បាននិយាយថា តំបន់ដែលរងផលប៉ះពាល់ដោយការផ្ដាច់នេះ រួមមានទីប្រជុំជន Tachileik, Myawaddy និង Phaya Thonsu នៅតាមព្រំដែនមីយ៉ាន់ម៉ា។

នៅថ្ងៃព្រហស្បតិ៍ (ទី៦ ខែកុម្ភៈ) នេះ អ្នកសារព័ត៌មានម្នាក់ បានប្រាប់ឲ្យដឹងថា អ្នកភូមិ និងសហគ្រិន នៅក្នុងទីក្រុង Myawaddy ដែលភាគច្រើនមិនមានទំនាក់ទំនងជាមួយក្រុមឆបោក ឬសកម្មភាពខុសច្បាប់នោះ កំពុងត្រូវបានរងផលប៉ះពាល់ដោយចំណាត់ការនេះ។

លោកបានបន្តថា ការរង់ចាំជាជួរដ៏វែង កំពុងមានកាន់តែច្រើនឡើងៗ នៅស្ថានីយសេវាកម្មប្រេង ខណៈអាជីវកម្ម នៅមូលដ្ឋាន និងមន្ទីរពេទ្យ បានរងផលប៉ះពាល់យ៉ាងខ្លាំង ដោយការដាច់ចរន្តអគ្គិសនីនេះ។ លោកបានបន្ថែមថា ស្ថានីយសេវាកម្មជាង ២០កន្លែង នៅទីក្រុង Myawaddy បានបិទដំណើរការ បន្ទាប់ពីអស់ប្រេងឥន្ធនៈ៕