តាកែវ ៖ ដើម្បីពង្រឹងប្រសិទ្ធភាពការងារផ្ដល់សេវាសាធារណៈជូនប្រជាពលរដ្ឋ និងថែរក្សាសន្តិសុខសាធារណៈ នៅក្នុងមូលដ្ឋានឱ្យកាន់តែប្រសើរ អភិបាលខេត្តតាកែវ បានដាស់តឿនអភិបាលក្រុង ស្រុក និងសមត្ថកិច្ច ពាក់ព័ន្ធ ឱ្យបង្កើតក្រុមការងារនៅតាមបណ្ដាក្រុង ស្រុក ដើម្បីក្ដាប់ឱ្យបាននូវសំណូមពរ របស់ពលរដ្ឋ។
នៅចំពោះអភិបាលក្រុង ស្រុក និងសមត្ថកិច្ចពាក់ព័ន្ធ ក្នុងកិច្ចប្រជុំ ស្ដីពីការរៀបចំបង្កើតបណ្ដាញ សង្គមហ្វេសប៊ុកផ្លូវការ របស់រាជធានីខេត្ត ក្រុង ស្រុក តាមការណែនាំរបស់ក្រសួងមហាផ្ទៃ នៅថ្ងៃទី០២ ខែ វិច្ឆិកានេះ ឯកឧត្តម អ៊ូច ភា អភិបាលខេត្តតាកែវ បានលើកឡើងថា បច្ចុប្បន្ននេះ ប្រជាពលរដ្ឋ កាន់តែច្រើន ឡើង បានធ្វើការសំណូមពរដល់អាជ្ញាធរ តាមរយៈបណ្ដាញសង្គមហ្វេសប៊ុក ឱ្យជួយដោះស្រាយបញ្ហា ប្រឈមនានា នៅក្នុងមូលដ្ឋានរបស់ពួកគេ ដូច្នេះអាជ្ញាធរក្រុង ស្រុក ទាំងអស់ ត្រូវធ្វើការបង្ហោះនូវសកម្ម ភាពបម្រើកិច្ចការជូនប្រជាពលរដ្ឋ ឬសង្គមភាពជួយសង្គម ព្រមទាំងត្រូវបង្កើតក្រុមការងារតាមដានឱ្យបាន ជាប់ជាប្រចាំ នៅតាមបណ្ដាញសង្គមផ្លូវការរបស់ក្រុងស្រុក ដើម្បីធ្វើយ៉ាងណាដោះស្រាយនូវការសំណូម ពរនានា និងឆ្លើយតបទៅកាន់ប្រជាពលរដ្ឋឱ្យបានទាន់ពេលវេលា។
ឯកឧត្តម បានបន្តថា រាល់ការសំណូមពររបស់ប្រជាពលតាមបណ្ដាញទំនាក់ទំនងសង្គម ត្រូវតែ ចាត់វិធានការដោះស្រាយឆ្លើយតបឱ្យបានត្រឹមត្រូវប្រកបដោយតម្លាភាព និងយុត្តិធម៌ ស្រប តាមច្បាប់ និងលិខិតបទដ្ឋានគតិយុត្តិជាធរមាន ហើយរាល់បញ្ហាណា ដែលអាជ្ញាធរក្រុង ស្រុក មិនអាច ដោះស្រាយបាន ត្រូវបញ្ជូនបញ្ហាទាំងអស់នេះទៅខេត្ត ដើម្បីដោះស្រាយបន្តទៀត។
ឯកឧត្តម អភិបាលខេត្តតាកែវ បានណែនាំឱ្យពិនិត្យមើល និងចាត់វិធានការតាមច្បាប់ ចំពោះការ ផ្ដល់ព័ត៌មានមិនពិត ដែលមានលក្ខណៈញុះញង់ អុជអាល ឱ្យប៉ះពាល់ដល់ស្ថិរភាពនយោបាយ សន្តិសុខ សាធារណៈ៕
អត្ថបទ៖ គុជ វិភាគ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
