កម្មវិធីស្បៀងអាហារពិភពលោក(WFP) បាននិយាយថា ពួកគេកំពុងបង្កើនការចែកចាយជំនួយស្បៀងអាហារនៅតំបន់ភាគខាងជើងហ្កាហ្សា ស្របពេលមានការហក់ឡើងខ្ពស់ការនាំចូលស្បៀងអាហារចូលទៅកាន់ដែនដីបិទច្រកមួយនេះ ចាប់តាំងពីបទឈប់បាញ់ ចូលជាធរមានរវាងក្រុមហាម៉ាស់ និងអ៊ីស្រាអែល ។

WFP និយាយថា ពួកគេបានបើកហាងផលិតនំ ហើយគ្រោងនឹងបង្កើនការផលិតចំណីអាហារចំនួនទ្វេដងនៅតំបន់ភាគខាងជើងហ្កាហ្សា ក្រោយមនុស្សរាប់ម៉ឺននាក់ បានវិលត្រឡប់មកកាន់ផ្ទះរបស់ពួកគេវិញ ចេញពីតំបន់ភាគខាងត្បូង ។

WFP និយាយទៀតថា ទោះបីជាយ៉ាងណាក៏ដោយ ស្ថានភាពមនុស្សធម៌នៅតែគ្រោះថ្នាក់ដដែល ហើយគ្មានអាហារគ្រប់គ្រាន់នៅក្នុងតំបន់ហ្កាហ្សានោះទេ ។

លោក Carl Skau គឺជាអនុប្រធានប្រតិបត្តិរបស់ WFP បាននិយាយនៅទីក្រុងហ្កាហ្សាថា បើនិយាយពីមនុស្សនៅទីនេះ ពួកគេមួយចំនួនមាននូវក្តីសង្ឃឹមខ្លះ ប៉ុន្តែខ្ញុំគិតថា មាននូវការភាំងស្មារតីផងដែរ ។ ពួកគេពិតជាមានការព្រួយបារម្ភខ្លាំងចំពោះអ្វីនឹងកើតឡើងនៅពេលអនាគត ។

សូមបញ្ជាក់ថា ជាងពាក់កណ្តាលនៃដីកសិកម្មក្នុងតំបន់ហ្កាហ្សា ដែលសំខាន់សម្រាប់ចិញ្ចឹមជីវិតពលរដ្ឋដ៏ច្រើននៅក្នុងដែនដីខ្ទេចខ្ទាំដោយសារសង្រ្គាមមួយនេះ ត្រូវបានបំផ្លិចបំផ្លាញដោយសារជម្លោះរវាងអ៊ីស្រាអែល និងក្រុមហាម៉ាស់ ។

ទិន្នន័យបានបង្ហាញពីការកើនឡើងនៃការបំផ្លិចបំផ្លាញសួនច្បារ ចំការដំណាំ និងបន្លែនៅក្នុងតំបន់បិទច្រកប៉ាឡេស្ទីនមួយនេះ ដែលភាពអត់ឃ្លានបានរីករាលដាលខ្លាំង បន្ទាប់ពីការទម្លាក់គ្រាប់បែករបស់អ៊ីស្រាអែលអស់រយៈពេល ១៥ខែ ៕