​

វិចិត្រករពហុជំនាញស៊ីរីនាង Tamara Bassam Abu Alwan បានអបអរសាទរការផ្តួលរំលំលោកប្រធានាធិបតី Bashar al-Assad ជាមួយនឹងផ្ទាំងគំនូរនៅសង្កាត់ Shaalan ស្ថិតក្នុងទីក្រុងដាម៉ាស់ ដែលបង្ហាញរូបភាពរូបតំណាងបដិវត្តន៍ប្រឆាំងលោក Assad ។

ផ្ទាំងគំនូរដែលនាង Abu Alwan ចាប់ផ្តើមគូរចាប់តាំងពីខែធ្នូរហូតមក មានសរសេរពាក្យចំណាប់អារម្មណ៍ជាច្រើន ដូចជាពាក្យ “សេរីភាព” “ស៊ីរីសម្រាប់អ្នករាល់គ្នា” និង “ស៊ីរីមានសេរីភាព” ជាភាសាអារ៉ាប់ និងភាសាអង់គ្លេស ។

វិចិត្រករវ័យ ២៦ឆ្នាំរូបនេះ និយាយថា វាគឺជាគំនិតផ្តួចផ្តើមផ្ទាល់ខ្លួនមួយ ។ នាងបានគូរគំនូរ ហើយនិងយល់ឃើញថា ពណ៌គួរតែមាននៅតាមដងផ្លូវ ជាជាងគូរអ្វីមួយផ្ទាល់ខ្លួនសម្រាប់ខ្លួនឯង ។

នាង Abu Alwan ដែលបានណែនាំខ្លួននាងថាជាសកម្មជនសង្គម នយោបាយ និងមនុស្សធម៌ឯករាជ្យនោះ និយាយថា នាងបានចូលរួមការតវ៉ាប្រឆាំងលោក Assad តាំងពីនាងនៅក្មេងមានអាយុ ១៣ឆ្នាំមកម្ល៉េះ ។

ស្នាដៃសិល្បះចុងក្រោយរបស់នាង Abu Alwan ដែលជាផ្ទាំងគំនូរនេះ ទទួលបានការចាប់អារម្មណ៍ពីអ្នកដំណើរឆ្លងកាត់ រួមទាំងនិស្សិតវ័យក្មេងម្នាក់ និងយុទ្ធជនម្នាក់របស់ក្រុមឧទ្ទាម Hayat Tahrir al-Sham ដែលទើបវិលត្រឡប់មកកាន់ទីក្រុងដាម៉ាស់វិញកាលពីពេលថ្មីៗនេះ ។

សូមបញ្ជាក់ថា លោក Assad ត្រូវបានទម្លាក់ចេញពីអំណាចកាលពីថ្ងៃទី ៨ ខែធ្នូ ឆ្នាំ ២០២៤កន្លងទៅ ក្រោយការវាយប្រហារលឿនដូចផ្លេកបន្ទោរបស់ក្រុមអ៊ិស្លាម Hayat Tahrir al-Sham ដែលមេដឹកនាំរបស់ពួកគេគឺលោក Ahmed al-Sharaa ត្រូវបានប្រកាសជាប្រធានាធិបតីអន្តរកាល កាលពីសប្តាហ៍មុន ៕