ទីភ្នាក់ងារសារព័ត៌មានរដ្ឋរុស្ស៊ី RIA បានដកស្រង់សម្តីសមាជិកសភាជាន់ខ្ពស់ម្នាក់ ដែលបាននិយាយនៅថ្ងៃព្រហស្បតិ៍ (ទី៦ ខែកុម្ភៈ) នេះថា ការរៀបចំ សម្រាប់ជំនួប រវាងប្រធានាធិបតីរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump កំពុងស្ថិតក្នុង «ដំណាក់កាលជិតបញ្ចប់ទាំងស្រុងហើយ»។

សារព័ត៌មាននេះ បានដកស្រង់សម្តីលោក Leonid Slutsky ប្រធានគណៈកម្មាធិការកិច្ចការអន្តរជាតិរបស់រដ្ឋសភា Duma ដែលបាននិយាយថា កិច្ចប្រជុំនេះ អាចប្រព្រឹត្តទៅនៅក្នុងខែកុម្ភៈនេះ ឬខែមីនា។

ទាំងលោក Trump និងលោក Putin បានលើកឡើងថា ពួកលោកចង់រៀបចំកិច្ចប្រជុំមួយ ដែលរបៀបវារៈ អាចរួមបញ្ចូលការគ្រប់គ្រងអាវុធនុយក្លេអ៊ែរ និងតម្លៃថាមពលសកល ព្រមទាំងគោលបំណងដែលត្រូវបានអះអាងដោយលោក Trump ក្នុងការបញ្ចប់សង្រ្គាមអ៊ុយក្រែនយ៉ាងឆាប់រហ័ស។

ជាមួយគ្នានេះ លោក Slutsky បាននិយាយថា លោកក៏រំពឹងដែរថា មេដឹកនាំទាំង២ នឹងនិយាយអំពីស្ថានភាព នៅតំបន់មជ្ឈិមបូព៌ា។ លោកបានប្រាប់ថា៖ «ការងារនេះតម្រូវឲ្យមានការរៀបចំយ៉ាងហ្មត់ចត់។ ខ្ញុំមិនបានផ្តល់ជូននូវការសម្ងាត់ណាមួយនោះទេ ព្រោះបច្ចុប្បន្នកំពុងស្ថិតក្នុងដំណាក់កាលជិតបញ្ចប់ទាំងស្រុងហើយ»។ 

យ៉ាងណាក្ដី លោក Slutsky បានបដិសេធមិនប៉ាន់ស្មានពីពេលវេលាដែលកិច្ចប្រជុំនេះ អាចកើតឡើង៕