ភ្នំពេញ ៖ គណៈកម្មាធិការទី៩ ព្រឹទ្ធសភា នៃព្រះរាជាណាចក្រកម្ពុជា ដឹកនាំដោយឯកឧត្តម អ៊ុ សារឹទ្ធ បានទទួលសវនាការ ស្តីពីសមិទ្ធផល ការងារឆ្នាំ ២០២៤ លើបញ្ហាប្រឈម និងទិសដៅអនាគតរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

​ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងជំនួបសវនាការ ការងាររវាង គណៈកម្មការទី ៩ ព្រឹទ្ធសភា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី ៦ ខែ កុម្ភៈ ឆ្នាំ ២០២៥ នេះ ឯកឧត្តមរដ្ឋមន្រ្តី, បានជម្រាបជូនពីវឌ្ឍនភាពនៃអាណត្តិកិច្ចដ៏ទូលំទូលាយរបស់ក្រសួង រួមទាំងការអភិវឌ្ឍឧស្សាហកម្ម, ការគាំទ្រ សហគ្រាសធុន តូចនិងមធ្យម និងសិប្បកម្ម, ការពង្រីកសេវាទឹកស្អាត, ការវិវត្តផ្នែកវិទ្យាសាស្ត្រ បច្ចេកវិទ្យា និងនវានុវត្តន៍, និងការ ពង្រឹងហេដ្ឋារចនាសម្ព័ន្ធគុណភាពជាតិរបស់កម្ពុជា។ ឯកឧត្តមក៏បានរំលេចពីកិច្ចខិតខំប្រឹងប្រែង ក្នុងការអភិវឌ្ឍសេដ្ឋកិច្ចក្រៅ ប្រព័ន្ធ ឱ្យស្របតាមគោលដៅសង្គម-សេដ្ឋកិច្ច និងចក្ខុវិស័យកម្ពុជាឆ្នាំ២០៥០ ផងដែរ។

 ឯកឧត្តម អ៊ុ សារិទ្ធ ប្រធានគណៈកម្មាធិការទី៩ ព្រឹទ្ធសភា បានកោតសរសើរ ចំពោះសមិទ្ធផលការងាររបស់ក្រសួង និងលើក ឡើងថា គណៈកម្មាធិការទី៩ ព្រឹទ្ធសភា តែងចុះប្រមូលព័ត៌មាន និងតាមដានវឌ្ឍនភាព នៅតាមមូលដ្ឋានឧស្សាហកម្មនានា នៅក្នុង ប្រទេស និងថ្លែងអំណរគុណចំពោះក្រសួង ដែលបានរៀបចំសវនាការនេះ ព្រមទាំងផ្តល់ព័ត៌មាន និងបច្ចុប្បន្នភាពដោយផ្ទាល់ដល់ គណៈកម្មាធិការទី៩។

គណៈប្រតិភូ បានបង្ហាញចំណាប់អារម្មណ៍ ពិសេសលើការងារស្តង់ដារនីយកម្ម ដើម្បីជំរុញឧស្សាហកម្មក្នុងស្រុក និងលើក កម្ពស់សុវត្ថិភាពរបស់អ្នកប្រើប្រាស់ និងបានលើកនូវសំណួរមួយចំនួន ទាក់ទងនឹងការផ្គត់ផ្គង់ទឹកស្អាត ជាពិសេសនិរន្តរភាពនៃការ ប្រើប្រាស់ប្រភពទឹកក្រោមដី វិធានការក្នុងការសន្សំសំចៃទឹក និងកង្វល់ចំពោះសុខភាព និងសុខុមាលភាពរបស់ប្រជាពលរដ្ឋ។

គណៈប្រតិភូបានទទួលស្គាល់អាណត្តិកិច្ចដ៏ទូលំទូលាយរបស់ក្រសួង និងលើកឡើងថា ទំនួលខុសត្រូវទាំងនេះ ទាមទារឱ្យក្រសួងមាន មន្ត្រីរាជការ ដែលជាអ្នកវិទ្យាសាស្ត្រ និងអ្នកជំនាញបច្ចេកទេសឱ្យបានច្រើន។ ជំនួបសវនាការនេះ បង្ហាញពីតួនាទីត្រួតពិនិត្យដ៏សំខាន់ នៃអង្គនីតិបញ្ញត្តិក្នុងការធានាថា ក្រសួង-ស្ថាប័នអនុវត្តច្បាប់ បទប្បញ្ញត្តិ និងគោលនយោបាយជាតិប្រកបដោយប្រសិទ្ធភាព ទន្ទឹមនឹង នោះលើកកម្ពស់គណនេយ្យភាពរដ្ឋាភិបាល និងគាំទ្រដំណើរការតាមបែបប្រជាធិបតេយ្យ ដែលមានតុល្យភាពមួយនៅកម្ពុជា៕

អត្ថបទ៖ សុន រ៉ាឌី