ប្រទេសក្រិក បានប្រកាសភាពអាសន្ននៅលើកោះ សានតូរីនី (Santorini) បន្ទាប់ពីគ្រោះរញ្ជួយដីជាបន្តបន្ទាប់បានអង្រួនកោះទេសចរណ៍ដ៏ពេញនិយមមួយនេះក្នុងសប្តាហ៍នេះ ហើយបានជំរុញឱ្យអ្នកស្រុក និងបុគ្គលិកជាង ១០.០០០នាក់ជម្លៀសចេញ។

ចាប់តាំងពីថ្ងៃអាទិត្យសប្ដាហ៍មុនមក ការរញ្ជួយស្ទើរតែឥតឈប់ឈររាប់រយដងត្រូវបានកត់ត្រានៅក្នុងសមុទ្ររវាងកោះ Santorini និងកោះ អាម័រហ្គូស (Amorgos) ដែលកម្រិតខ្លាំងបំផុតគឺ ៥,២រ៉ិចទ័រ កាលពីយប់ថ្ងៃពុធសប្តាហ៍នេះ។

អាជ្ញាធរបានព្រមានពីហានិភ័យខ្ពស់នៃបំណាក់បាក់ដីនៅផ្នែកខ្លះនៃកោះ ដោយពួកគេបានបិទសាលារៀន បញ្ជូនក្រុមជួយសង្គ្រោះ និងណែនាំអ្នកស្រុកឱ្យជៀសវាងកំពង់ផែ និងការជួបជុំគ្នាក្នុងផ្ទះ។ កងកម្លាំង សេវាពន្លត់អគ្គិភ័យ និងនគរបាលត្រូវបានដាក់ពង្រាយទៅកាន់កោះ។

ក្រសួងវិបត្តិអាកាសធាតុ និងការពារជនស៊ីវិលនិយាយថា គ្រាអាសន្ននឹងបន្តរហូតដល់ថ្ងៃទី០៣ ខែមីនា ដើម្បីអនុញ្ញាតឱ្យខ្លួនឆ្លើយតបទៅនឹងតម្រូវការរបស់ប្រជាជន និងផលវិបាកនៃសកម្មភាពរញ្ជួយដីនេះ។ ក្រិកគឺជាប្រទេសមួយដែលងាយនឹងរញ្ជួយដីបំផុតនៅអឺរ៉ុប ប៉ុន្តែអ្នកស្រាវជ្រាវផ្នែករញ្ជួយដីនិយាយថា សកម្មភាពរញ្ជួយខ្ពស់នេះមិនធ្លាប់មានពីមុនមកទេ ហើយអាចមានរយៈពេលជាច្រើនសប្តាហ៍ ឬច្រើនខែ៕