ក្រសួងការពារជាតិរុស្ស៊ី បាននិយាយថា កងទ័ពរបស់ខ្លួនបានវាយបកទៅលើការវាយលុករបស់អ៊ុយក្រែន នៅតំបន់ Kursk ភាគខាងលិចរបស់រុស្ស៊ី កាលពីថ្ងៃព្រហស្បតិ៍ (០៦ កុម្ភៈ)។

របាយការណ៍របស់រុស្ស៊ីថ្មីនេះ បានកើតឡើងរយៈពេល ៦ខែ គិតចាប់ពីថ្ងៃដែលយោធាអ៊ុយក្រែន បានរុញច្រានឆ្លងកាត់ព្រំដែនចូលទៅក្នុងតំបន់ Kursk ដែលជាការវាយប្រហារបរទេសដ៏ធំបំផុតលើរុស្ស៊ី ចាប់តាំងពីសង្គ្រាមលោកលើកទីពីរមក។ ចាប់តាំងពីពេលនោះមក កងកម្លាំងរុស្ស៊ី បានដណ្តើមយកទឹកដីភាគច្រើនមកវិញ។

ក្រសួងការពារជាតិរុស្ស៊ីនិយាយថា កងទ័ពអ៊ុយក្រែន និងរថពាសដែកបានបើកការវាយប្រហារចំនួន ៨លើក នៅជិតភូមិ Ulanok និង Cherkasskaya Konopelka របស់តំបន់ Kursk។

ក្រសួងបន្ថែមថា ទីតាំងទីលំនៅទាំងនោះស្ថិតនៅក្រោមការគ្រប់គ្រងរបស់រុស្ស៊ី ហើយកងកម្លាំងអ៊ុយក្រែន រងការខាតបង់ធ្ងន់ធ្ងរ រួមទាំងទាហានជាង ២០០នាក់ និងយានរាប់សិបគ្រឿង។ អគ្គសេនាធិការនៃយោធាអ៊ុយក្រែន បានធ្វើសេចក្តីយោងយ៉ាងខ្លីពីសកម្មភាពយោធានៅក្នុងតំបន់ Kursk នៅក្នុងរបាយការណ៍មួយកាលពីយប់ថ្ងៃព្រហស្បតិ៍ ដោយគ្រាន់តែនិយាយថា មានការប៉ះទង្គិចគ្នាចំនួន ៥ទីតាំងបានកើតឡើង ដោយមិនបកស្រាយលម្អិតអ្វីឡើយ៕