ប្រធានាធិបតីប៉ាណាម៉ា លោក Jose Raul Mulino បាននិយាយកាលពីថ្ងៃព្រហស្បតិ៍សប្ដាហ៍នេះថា សហរដ្ឋអាមេរិកកំពុងផ្សព្វផ្សាយ "ការភូតកុហក និងសម្ដីគ្មានការពិត" បន្ទាប់ពីក្រសួងការបរទេសបានអះអាងថា នាវារបស់រដ្ឋាភិបាលសហរដ្ឋអាមេរិក នឹងអាចឆ្លងកាត់ព្រែកជីកប៉ាណាម៉ាដោយមិនចាំបាច់បង់ប្រាក់។

ការអត្ថាធិប្បាយនេះទំនងជាធ្វើឱ្យភាពតានតឹងរវាងប្រទេសទាំងពីរកាន់តែធ្ងន់ធ្ងរ បន្ទាប់ពីសហរដ្ឋអាមេរិកបានលើកឡើងពីវឌ្ឍនភាពលើកិច្ចសហប្រតិបត្តិការយោធា និងការប្រឈមទៅនឹងការចោទប្រកាន់ពីឥទ្ធិពលរបស់ចិននៅលើព្រែកជីកនេះ។

ក្រោយមក លោក Mulino បានបន្ថែមនៅលើប្រព័ន្ធផ្សព្វផ្សាយសង្គមថា លោកនឹងនិយាយទៅកាន់ប្រធានាធិបតីអាមេរិកលោក Donald Trump នៅរសៀលថ្ងៃសុក្រសប្ដាហ៍នេះ។

ប៉ាណាម៉ា បានស្ថិតនៅក្នុងគោលដៅរបស់សេតវិមានចាប់តាំងពីលោក Trump បានអះអាងថាផ្លូវទឹកដ៏សំខាន់របស់ប្រទេសនេះត្រូវបានកាន់កាប់ដោយប្រទេសចិនប្រកបដោយប្រសិទ្ធភាព ហើយបានប្តេជ្ញាថាសហរដ្ឋអាមេរិកនឹងយកព្រែកជីកនេះមកវិញ។

ថ្លែងទៅកាន់អ្នកសារព័ត៌មាន លោក Mulino បានបង្ហាញពី "ការបដិសេធទាំងស្រុង" ចំពោះគំនិតដែលថាទំនាក់ទំនងរបស់ប្រទេសទាំងពីរនឹង "ផ្អែកលើការភូតកុហក និងការមិនពិត។

ក្រសួងការបរទេសសហរដ្ឋអាមេរិកពុំបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ សេតវិមានក៏ពុំបានឆ្លើយតបភ្លាមៗដែរ គិតត្រឹមថ្ងៃសុក្រសប្ដាហ៍នេះ៕