ទីភ្នាក់ងារជនភៀសខ្លួន និងអន្តោប្រវេសន៍របស់អង្គការសហប្រជាជាតិនៅសប្ដាហ៍នេះបានបង្ហាញការព្រួយបារម្ភចំពោះការសម្រេចចិត្តរបស់ប៉ាគីស្ថានក្នុងការនិរទេសជនភៀសខ្លួនអាហ្វហ្គានីស្ថានរាប់ពាន់នាក់ដែលកំពុងរង់ចាំការផ្លាស់ទីលំនៅទៅកាន់សហរដ្ឋអាមេរិក និងបណ្ដាប្រទេសនៅបស្ចិមលោក ដែលបានសន្យាទទួលយកពួកគេនិងផ្ដល់ជម្រកឲ្យពួកគេក្នុងប្រទេសរបស់ខ្លួន។

ប្រទេសប៉ាគីស្ថានចេញថ្ងៃកំណត់ ឬឱសានវាទសម្រាប់ជនភៀសខ្លួនអាហ្វហ្គានីស្ថាន បន្ទាប់ពីលោក Trump រារាំងការផ្លាស់ប្តូរទីលំនៅក្នុងទឹកដីសហរដ្ឋអាមេរិក។ នាយករដ្ឋមន្ត្រីប៉ាគីស្ថាន បានកំណត់មុនថ្ងៃ៣១ខែមីនាឆ្នាំ២០២៥នេះ  ពុំនោះប៉ាគីស្ថាននឹងបញ្ជូនពួកគេទៅអាហ្វហ្គានីស្ថានវិញ។

ទោះយ៉ាងណាក៏ដោយ ពួកគេត្រូវបានទុកចោលក្នុងសភាពមិនច្បាស់លាស់ បន្ទាប់ពីលោកប្រធានាធិបតី Donald Trump បានផ្អាកកម្មវិធីជនភៀសខ្លួនរបស់សហរដ្ឋអាមេរិកកាលពីខែមុន។    

ទីភ្នាក់ងារជនភៀសខ្លួនរបស់អង្គការសហប្រជាជាតិ UNHCR និងអង្គការទេសន្តរប្រវេសន៍អន្តរជាតិបាននិយាយនៅក្នុងសេចក្តីថ្លែងការណ៍មួយថាពួកគេកំពុងស្វែងរកការបំភ្លឺពីប៉ាគីស្ថាន ដែលបាននិយាយកាលពីសប្តាហ៍មុនថា ខ្លួននឹងនិរទេសជនភៀសខ្លួនត្រឡប់ទៅអាហ្វហ្គានីស្ថានវិញ លុះត្រាតែករណីរបស់ពួកគេត្រូវបានដំណើរការយ៉ាងឆាប់រហ័សដោយបណ្ដាប្រទេសទី៣ដែលបានយល់ព្រមទទួលយកពួកគេ។

ជនជាតិអាហ្វហ្គានីស្ថានប្រហែល ២០.០០០នាក់ ត្រូវបានអនុម័តសម្រាប់ការតាំងទីលំនៅថ្មីនៅក្នុងសហរដ្ឋអាមេរិកក្រោមកម្មវិធីជួយមនុស្សដែលមានហានិភ័យដោយសារតែការងាររបស់ពួកគេជាប់ពាក់ព័ន្ធជាមួយរដ្ឋាភិបាលអាមេរិក ប្រព័ន្ធផ្សព្វផ្សាយ ទីភ្នាក់ងារជំនួយ និងក្រុមសិទ្ធិមនុស្ស។ ពួកគេស្ថិតក្នុងចំណោមជនអាហ្វហ្គានីស្ថានរាប់ម៉ឺននាក់ដែលបានភៀសខ្លួនទៅកាន់ប្រទេសជិតខាងប៉ាគីស្ថាន បន្ទាប់ពីប្រទេសរបស់ពួកគេបានធ្លាក់ក្នុងកណ្ដាប់ដៃក្រុមតាលីបង់ក្នុងឆ្នាំ ២០២១ ៕