បណ្ដាប្រទេសនៅអឺរ៉ុប ជាពិសេសសម្ព័ន្ធយោធាណាតូ បានខិតខំបង្កើនការត្រៀមលក្ខណៈរបស់ខ្លួននៅក្នុងសង្រ្គាម ក្នុងសកម្មភាពមួយដែលគេមើលឃើញថាដើម្បីទប់ទល់ភាពស្រពេចស្រពិលរបស់រដ្ឋបាលសហរដ្ឋអាមេរិកថ្មី។

សមយុទ្ធដ៏ធំលើកទីមួយរបស់អង្គការណាតូនៅឆ្នាំនេះ ឈ្មោះថា "ព្រួញដ៏រឹងមាំ" ឬជាភាសាអង់គ្លេសថា Steadfast Dart បានមើលឃើញកងកម្លាំងឆ្លើយតបសម្ព័ន្ធមិត្ត ARF របស់ខ្លួន ដាក់ពង្រាយទាហាន ១០.០០០នាក់ ជាមួយនឹងយន្តហោះ នាវាចម្បាំង និងយានធ្វើសឹកជាង ១.៥០០គ្រឿងទៅកាន់ទ្វីបអឺរ៉ុបខាងត្បូង ដែលមិនឆ្ងាយប៉ុន្មានពីព្រំដែនអ៊ុយក្រែន។

ពួកគេបានអនុវត្តការហាត់សមក្នុងរយៈពេល ៥សប្តាហ៍កន្លងមកនេះ ដើម្បីក្លាយជាកងកម្លាំងដំបូងដើម្បីទប់ទល់វិបត្តិនាពេលអនាគត។ ក្រៅពីបុគ្គលិកទំនាក់ទំនងអាមេរិកមួយក្តាប់តូច កងកម្លាំង ARF នេះមិនមានទម្រង់យោធាអាមេរិកធំដុំទេ ហើយកងទ័ពរបស់ខ្លួនមកពីប្រទេសសមាជិកណាតូចំនួន៩ ដោយមានកម្លាំងច្រើនជាងគេពីចក្រភពអង់គ្លេស។

លោកប្រធានាធិបតីអាមេរិក Donald Trump និងក្រុមរបស់លោក បានចំណាយពេលសប្តាហ៍ដំបូងនៃរដ្ឋបាលថ្មី ដាក់ចេញនូវអ្វីដែលខ្លួនចង់ឃើញពីមិត្តភ័ក្តិ និងសម្ព័ន្ធមិត្ត ជាពិសេសការបង្កើនការចំណាយលើវិស័យការពារជាតិពីសមាជិកណាតូអឺរ៉ុប ក៏ដូចជាកាណាដា។ សមយុទ្ធ Steadfast Dart និងសកម្មភាពផ្សេងទៀត គឺជាផ្នែកមួយនៃគោលបំណងបង្ហាញដល់អាមេរិកថា សម្ព័ន្ធយោធា និងសមាជិករបស់ខ្លួនបានទទួលសាររបស់លោកហើយ។

ទោះជាយ៉ាងណាក៏ដោយ ភាពមិនប្រាកដប្រជារបស់លោក Trump បានក្លាយជារឿងដ៏ក្ដៅគគុកភ្លាមៗនៅអឺរ៉ុប។ នៅក្នុងទីក្រុងវ៉ាស៊ីនតោន មានការពិភាក្សាដែលថាមន្ទីរបញ្ចកោណអាចនឹងដកកងពលតូចប្រយុទ្ធរបស់អាមេរិកចំនួនពីរ - រហូតដល់ ១០.០០០នាក់ - ពីទ្វីបអឺរ៉ុប។ មន្ត្រីអង្គការណាតូ ទទួលស្គាល់ថាការរួមចំណែករបស់អាមេរិកគឺ "ច្រើនខ្លាំង" ប៉ុន្តែក៏និយាយថា ផែនការសង្រ្គាមគឺ "អាចបត់បែនបាន" សម្រាប់កងកម្លាំងដែលមាននៅពេលនេះ៕