ប្រមុខអង្គការសហប្រជាជាតិលោក Antonio Guterres បានអំពាវនាវពិសេសសម្រាប់សន្តិភាព នៅមុនកិច្ចប្រជុំធំៗចំនួនពីរ ដើម្បីទប់ស្កាត់អំពើហិង្សា និងការវាយលុកដ៏ឃោរឃៅរបស់ក្រុមឧទ្ទាម M23 គាំទ្រដោយប្រទេសរ៉ា្វន់ដា នៅទូទាំងតំបន់ ហើយនិយាយថាដល់ពេលសម្រាប់សន្តិភាពហើយ ។   

លោក Guterres បានហៅស្ថានភាពនេះថា "មានការព្រួយបារម្ភយ៉ាងខ្លាំង" ហើយបានប្រាប់អ្នកសារព័ត៌មាននៅឯទីស្នាក់ការអង្គការសហប្រជាជាតិក្នុងទីក្រុងញូវយ៉កថា យើងកំពុងស្ថិតក្នុងដំណាក់កាលសំខាន់មួយ ហើយជាពេលវេលាប្រមូលផ្តុំគ្នាដើម្បីសន្តិភាព។             

ដោយនិយាយថាកិច្ចប្រជុំកំពូលមួយនឹងប្រព្រឹត្តទៅក្នុងប្រទេសតង់ហ្សានីជាមួយសហគមន៍អាហ្វ្រិកខាងកើត និងមេដឹកនាំសហគមន៍អភិវឌ្ឍន៍អាហ្វ្រិកខាងត្បូង លោក Guterres បានបញ្ជាក់ថាជំនួបនោះផ្តោតលើការវាយប្រហារ និងការប៉ះទង្គិចគ្នារវាងពួកឧទ្ទាម M23 ជាមួយយោធាកុងហ្គោ។      

លោកបានប្រកាសថា សប្តាហ៍ក្រោយនៅទីក្រុង Addis Ababa លោកនឹងចូលរួមក្នុងកិច្ចប្រជុំកម្រិតកំពូលនៃក្រុមប្រឹក្សាសន្តិភាព និងសន្តិសុខសហភាពអាហ្រ្វិក ជាទីដែលវិបត្តិនេះក៏នឹងក្លាយជារបៀបវារៈសំខាន់ផងដែរ ដោយសង្កត់ធ្ងន់លើការអំពាវនាវពិសេសរបស់លោកសម្រាប់សន្តិភាព ។  

លោក Guterres បានសង្កត់ធ្ងន់ថា ការគំរាមកំហែងដោយក្រុមប្រដាប់អាវុធនៅក្នុងប្រទេសកុងហ្គោ ក៏ដូចជាការប៉ះទង្គិចគ្នាជាមួយក្រុមឧទ្ទាម M23 បាននាំឱ្យមនុស្សយ៉ាងច្រើនសម្បើម ដែលជនស៊ីវិលរាប់ពាន់នាក់ត្រូវបានសម្លាប់ និងជាច្រើនត្រូវបានបង្ខំឲ្យរត់ភៀសខ្លួនចេញពីជម្រក៕