ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (០៦ កុម្ភៈ) បានអនុញ្ញាតឱ្យដាក់ទណ្ឌកម្មសេដ្ឋកិច្ច និងការធ្វើដំណើរ សំដៅលើបុគ្គលណា ដែលធ្វើការលើការស៊ើបអង្កេតរបស់តុលាការព្រហ្មទណ្ឌអន្តរជាតិ ICC លើពលរដ្ឋអាមេរិក ឬសម្ព័ន្ធមិត្តរបស់សហរដ្ឋអាមេរិក ដូចជាអ៊ីស្រាអែលជាដើម ដោយបានដាក់ដំណើរការឡើងវិញនូវវិធានការដែលលោកធ្លាប់បានធ្វើក្នុងអាណត្តិដំបូង។

ជំហាននេះកើតឡើងស្របពេលជាមួយនឹងដំណើរទស្សនកិច្ចទៅកាន់ទីក្រុងវ៉ាស៊ីនតោន របស់នាយករដ្ឋមន្ត្រីអ៊ីស្រាអែល លោក Benajmin Netanyahu - ដែលដូចជាអតីតរដ្ឋមន្ត្រីការពារជាតិរបស់លោក និងមេដឹកនាំក្រុមសកម្មប្រយុទ្ធប៉ាឡេស្ទីនហាម៉ាសដែរ - គឺត្រូវបានតុលាការ ICC ចេញដីកាតាមចាប់ខ្លួនដោយសារសង្គ្រាមនៅតំបន់ហ្កាហ្សាស្ទ្រីប។

គេមិនច្បាស់ទេថា តើអាមេរិកនឹងប្រកាសឈ្មោះអ្នកដែលត្រូវបានដាក់ទណ្ឌកម្មនោះនៅពេលណា ហើយ ICC មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ ទណ្ឌកម្មទាំងនោះរួមមាន ការបង្កកទ្រព្យសម្បត្តិនៅអាមេរិករបស់បុគ្គលដែលរងទណ្ឌកម្ម និងរារាំងពួកគេ និងក្រុមគ្រួសាររបស់ពួកគេមិនឱ្យចូលទឹកដីសហរដ្ឋអាមេរិក។

ICC ដែលមានសមាជិក ១២៥ប្រទេស គឺជាតុលាការអចិន្ត្រៃយ៍ដែលអាចកាត់ទោសបុគ្គល ចំពោះឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ អំពើប្រល័យពូជសាសន៍ និងឧក្រិដ្ឋកម្មឈ្លានពានប្រឆាំងនឹងទឹកដីនៃរដ្ឋជាសមាជិក ឬជាតិសាសន៍របស់ពួកគេ។ សហរដ្ឋអាមេរិក ចិន រុស្ស៊ី និងអ៊ីស្រាអែល មិនមែនជាសមាជិករបស់តុលាការនេះទេ៕