យល់បក់បោកយ៉ាងខ្លាំងក្លាដែលនាំមកដោយរលកត្រជាក់ បានវាយប្រហារផ្នែកខ្លះនៃភាគខាងជើងប្រទេសចិន ដោយនាំមកនូវសីតុណ្ហភាពត្រជាក់ និងបណ្តាលឱ្យមានទឹកកកលើផ្ទៃសមុទ្រជាច្រើននៅក្នុងតំបន់មួយចំនួន។

នៅទីក្រុងប៉េកាំង ស្ថានីយ៍ឧតុនិយមចំនួន ២៥កន្លែង បានពិនិត្យឃើញខ្យល់ព្យុះលើសពីកម្រិតទី៨ ហើយស្ថានីយចំនួន២ បានពិនិត្យឃើញខ្យល់ព្យុះលើសពីកម្រិតទី៩ កាលពីថ្ងៃព្រហស្បតិ៍ (០៦ កុម្ភៈ) ដែលបង្ហាញពីល្បឿនខ្យល់ជាង ៣០គីឡូម៉ែត្រក្នុងមួយម៉ោង។

សេវាកម្មឧតុនិយមទីក្រុងប៉េកាំង បានចេញសញ្ញាព្រមានពណ៌ខៀវ សម្រាប់សីតុណ្ហភាពត្រជាក់ជាបន្តនៅរសៀលថ្ងៃព្រហស្បតិ៍ ហើយខ្យល់បោកបក់ខ្លាំងនឹងបន្តរហូតដល់ថ្ងៃសុក្រ (០៧ កុម្ភៈ) នេះ។ សីតុណ្ហភាពទាបបំផុតនៅពេលយប់ក្នុងតំបន់មួយចំនួននៃទីក្រុង ត្រូវបានព្យាករថានឹងក្រោម -១០អង្សាសេ ចាប់ពីថ្ងៃព្រហស្បតិ៍ ដល់ថ្ងៃសៅរ៍ចុងសប្ដាហ៍។

ក្រុមសង្កេតការណ៍ក៏បានចេញការព្រមានពណ៌ខៀវសម្រាប់ព្យុះខ្សាច់ និងការព្រមានពណ៌លឿងសម្រាប់ខ្យល់ខ្លាំងកាលពីថ្ងៃព្រហស្បតិ៍ផងដែរ។ ទឹកកកលើផ្ទៃសមុទ្រនៅឈូងសមុទ្រ ឡាវតុង (Liaodong) នៃសមុទ្រ ប៉ូហៃ (Bohai) បានរាលដាលពាសពេញផ្ទៃទឹកប្រហែល ៨.០០០គីឡូម៉ែត្រក្រឡា ដែលច្រើនជាងមួយភាគបួននៃផ្ទៃដីនៃឈូងសមុទ្រនេះ។

យោងតាមការព្យាករអាកាសធាតុបានឱ្យដឹងថា ខ្យល់ត្រជាក់នៅឈូងសមុទ្រ Liaodong នឹងបន្តអូសបន្លាយរហូតដល់ថ្ងៃអាទិត្យចុងសប្ដាហ៍ ដែលនាំមកនូវទឹកកកលើផ្ទៃសមុទ្រកាន់តែច្រើន៕