មន្រ្តីក្រសួងការបរទេសមួយរូបបានលើកឡើងថា រដ្ឋមន្ត្រីការបរទេសអាមេរិក លោក Marco Rubio នឹងធ្វើទស្សនកិច្ចនៅអ៊ីស្រាអែល និងបណ្ដារដ្ឋអារ៉ាប់ នៅពាក់កណ្តាលខែកុម្ភៈនេះ ជាលើកដំបូងរបស់លោកទៅកាន់មជ្ឈិមបូព៌ា បន្ទាប់ពីសំណើដែលត្រូវបានថ្កោលទោសយ៉ាងទូលំទូលាយរបស់លោកប្រធានាធិបតី Donald Trump ក្នុងការផ្លាស់ទីលំនៅប្រជាជនប៉ាឡេស្ទីន និងអាមេរិកចូលកាន់កាប់តំបន់ហ្កាហ្សា។

មន្ត្រីជាន់ខ្ពស់ក្រសួងការបរទេសបាននិយាយកាលពីយប់ថ្ងៃព្រហស្បតិ៍ (០៦ កុម្ភៈ) សប្ដាហ៍នេះថា លោក Rubio នឹងធ្វើដំណើរទៅកាន់សន្និសីទសន្តិសុខទីក្រុង Munich និងទៅកាន់ប្រទេសអ៊ីស្រាអែល អារ៉ាប់រួម កាតា និងអារ៉ាប៊ីសាអ៊ូឌីត ចាប់ពីថ្ងៃទី១៣ ដល់ទី១៨ ខែកុម្ភៈ ខាងមុខនេះ។

ក្រុមសិទ្ធិមនុស្ស និងអ្នកផ្សេងទៀតបានថ្កោលទោសការលើកឡើងរបស់លោក Trump ដែលថា ប្រជាជនប៉ាឡេស្ទីននៅតំបន់ហ្កាហ្សា គួរតែផ្លាស់ទីលំនៅជាអចិន្ត្រៃយ៍ ដែលជាផ្នែកមួយនៃការកាន់កាប់របស់សហរដ្ឋអាមេរិក នៃតំបន់ហ៊ុមព័ទ្ធនេះ។ លោក Rubio បាននិយាយសម្រាលមកវិញថា ប្រជាជនប៉ាឡេស្ទីននៅហ្កាហ្សា នឹងត្រូវផ្លាស់ប្តូរទីតាំង "បណ្តោះអាសន្នប៉ុណ្ណោះ" ខណៈពេលសាងសង់ឡើងវិញ បន្ទាប់ពីសង្គ្រាមអ៊ីស្រាអែល-ហ្កាហ្សា។

មន្ត្រីសហរដ្ឋអាមេរិកនិយាយថា លោក Rubio នឹងពិភាក្សាអំពីរឿងតំបន់ហ្កាហ្សា និងផលវិបាកនៃការវាយប្រហារនៅថ្ងៃទី០៧ ខែតុលា ឆ្នាំ២០២៣ ពីក្រុមហាម៉ាស លើអ៊ីស្រាអែល អំឡុងពេលទស្សនកិច្ចនោះ ហើយនឹងបន្តវិធីសាស្រ្តរបស់លោក Trump ក្នុងការព្យាយាមបង្អាក់ស្ថានការណ៍ក្នុងតំបន់៕