ភ្នំពេញ ៖ កម្ពុជាផ្សព្វផ្សាយ និងការលើកកម្ពស់ការយល់ដឹងដល់ប្រជាពលរដ្ឋ និងស្ថាប័នពាក់ព័ន្ធនៅរាជធានីភ្នំពេញ សម្រាប់ទីផ្សារការធានារ៉ាប់ រងជាកាតព្វកិច្ច លើវិស័យយានយន្ត និងការដ្ឋានសាងសង់ ដែលជាកាតព្វកិច្ចតម្រូវឱ្យទិញធានារ៉ាប់រង ដើម្បីចូលរួមលើកកម្ពស់វិស័យទាំង នេះ ប្រកបដោយការទទួលខុសត្រូវ។

ឯកឧត្តម ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា លើកឡើងនៅក្នុងសិក្ខាសាលាផ្សព្វផ្សាយ ស្តីពីការធានារ៉ាប់រងជា កាតព្វកិច្ច នៅថ្ងៃទី ៧ ខែ កុម្ភៈ ឆ្នាំ ២០២៥ នេះថា ជុំវិញវិញធានារ៉ាប់រងជាកាតព្វកិច្ចនេះ បើយោងតាមច្បាប់, កម្ពុជាបានអនុម័តឱ្យប្រើ ប្រាស់តាំងពីឆ្នាំ ២០០០ ដោយបានកែសម្រួលជំនួសដោយច្បាប់ស្តីពីការធានារ៉ាប់រងនៅឆ្នាំ ២០១៤ ដែលកំណត់ការធានារ៉ាប់រងចំនួន៣ ជាកាតព្វកិច្ចរួមមាន៖ ការធានារ៉ាប់រងធារៈការទទួលខុសត្រូវយានយន្តមាន៖ ទី១. ម្ចាស់យានយន្តដែលប្រកបអាជីវកម្មនៅកម្ពុជា ត្រូវមាន ការធានារ៉ាប់រងរបស់ខ្លួន ពីក្រុមហ៊ុនធានារ៉ាប់រងណាមួយ រាល់ការខូចខាតបង្កឡើងដោយតតីជន បណ្តាលមកពីគ្រោះថ្នាក់ចរាចរណ៍ បង្ករ ឡើងដោយយានយន្តរបស់ខ្លួន។ ទី២. ការធានារ៉ាប់រងភារទទួលខុសត្រូវការដឹកជញ្ជូនអ្នកដំណើរ ដែលកំណត់ថា ប្រតិបត្តិករអាជីវកម្មដឹក ជញ្ជូនអ្នកដំណើរ រួមទាំងភ្ញៀវទេសចរតាមមធ្យោបាយដឹកជញ្ជូននានា ដែលមានការធានារ៉ាប់រងភារៈទទួលខុសត្រូវ ចំពោះអ្នកដំណើរ ដែលជិះតាមមធ្យោបាយដឹកជញ្ជូនរបស់ខ្លួន ទោះបីជាមធ្យោបាយនោះចរាចរណ៍តាមផ្លូវគោក, ផ្លូវទឹក, ផ្លូវដែក ឬផ្លូវអាកាសក៏ដោយ។ និងទី៣. ការធានារ៉ាប់រងភារទទួលខុសត្រូវលើការដ្ឋាន កំណត់ថា រូបវ័ន្តបុគ្គល ឬនីតិបុគ្គល ទាំងឡាយដែល ជាម្ចាស់ការដ្ឋានត្រូវមាន ភស្តុតាងបញ្ជាក់ថា ខ្លួនមានកិច្ចសន្យាធានារ៉ាប់រងលើភារៈទទួលខុសត្រូវ លើការដ្ឋានដែលធានាសំណង់ ជូនជនរងគ្រោះ ដែលរងផលប៉ះ ពាល់ទាំងរូបរាងកាយ និងទ្រព្យសម្បតិ្តដែលបង្កដោយសកម្មភាពរបស់ការដ្ឋានជាដើម។

ឯកឧត្តម បន្តថា តាមរយៈសិក្ខាសាលាផ្សព្វផ្សាយ ស្តីពីការធានារ៉ាប់រងជាកាតព្វកិច្ចនេះ ពិតជាមានសារៈសំខាន់ណាស់ ដើម្បី លើកកម្ពស់លើការយល់ដឹងដល់ប្រជាពលរដ្ឋ និងស្ថាប័នពាក់ព័ន្ធ លើទីផ្សារការធានារ៉ាប់រងជាកាតព្វកិច្ច ចំពោះម្ចាស់យានយន្ត និងម្ចាស់ ការដ្ឋានសាងសង់ផ្សេងៗ បានស្វែងយកអំពីផ្លូវច្បាប់ ដោយត្រូវបំពេញតាមផ្លូវច្បាប់ លើការទិញធានារ៉ាប់រងលើវិស័យយានយន្ត និង ការដ្ឋានសាងសង់ផ្សេងៗ។ បញ្ហានេះ, ឯកឧត្តមបានបញ្ជាក់យ៉ាងខ្លីថា ចំពោះការធានារ៉ាប់រងជាកាតព្វកិច្ចនេះ គឺតម្រូវឱ្យទិញធានារ៉ាប់រង ក្នុងនោះបើមិនទិញធានារ៉ាប់រង គឺខុសច្បាប់, ហើយបើខុសច្បាប់ត្រូវតែជាប់ទោសទណ្ឌ។ 

លោកជំទាវ តិមា វិច្ឆិកាល អភិបាលរងនៃគណៈអភិបាលរាជធានីភ្នំពេញ លើកឡើងឱ្យដឹងថា ទាក់ទិនការធានារ៉ាប់រងកាតព្វកិច្ច ចំពោះយានយន្ត ក្នុងនោះបើតាមទូរលេខចុងក្រោយរបស់អាជ្ញាធរមានសមត្ថកិច្ច ចំនួនយានយន្តនៅរាជធានីភ្នំពេញ បច្ចុប្បន្នមានជាង ៣ លានគ្រឿង រថយន្តធុកធ្ងន់មានចំនួនជាង ១៣ ម៉ឺនគ្រឿង, ធុនស្រាសជាង ៦០ ម៉ឺនគ្រឿង និងទោចក្រយានជាង ២.៥ លានគ្រឿង ។ ចំណែកទាក់ទិនវិស័យសំណង់វិញ, រាជធានីភ្នំពេញមានសំណង់ជាច្រើន ចំណែកអគារខ្ពស់ៗ បើគិតពីឆ្នាំ២០០៥ មកដល់ឆ្នាំ២០២៤ មានចំនួនប្រមាណ ១ ៨០០ អគារ ក្នុងនោះអគារដែលមានកម្ពស់ ៥ ទៅ ១៩ ជាន់ មានចំនួន ១ ៥០០ អគារ, ពី ២០ ទៅ ៣៩ ជាន់ មានចំនួនជាង ២០០ អគារ និងចាប់ពី ៤០ ជាន់ឡើងទៅ មានចំនួនប្រមាណ ៥០ អគារ៕

អត្ថបទ៖ សុន រ៉ាឌី