ការស្ថាបនាហេដ្ឋារចនាសម្ព័ន្ធផ្លូវ៣៨ខ្សែប្រវែងជាង១០៨គីឡូម៉ែត្រ គិតត្រឹមថ្ងៃទី១០ ខែវិច្ឆិកា ឆ្នាំ២០២១ សម្រេចជារួមបាន៨៩,៣៩ភាគរយនៃទំហំការងារសរុប និងការស្ដារការកែលម្អដងស្ទឹងសៀមរាបទាំងសងខាង សម្រេចជារួមបាន ៦៦ភាគរយនៃផែនការ ខណៈគ្រោងបញ្ចប់ការសាងសង់នៅថ្ងៃទី២៩ ខែធ្នូ ឆ្នាំ២០២១ខាងមុខនេះ។

យោងតាមសេចក្តីប្រកាសព័ត៌មាន របស់គណៈកម្មការអន្តរក្រសួងដើម្បីសិក្សានិងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាបខេត្តសៀមរាប បានឲ្យដឹងថា នៅថ្ងៃទី១៣ ខែវិច្ឆិកា ឆ្នាំ២០២១ សម្ដេចពិជ័យសេនា ទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដើម្បីសិក្សានិងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាប ខេត្តសៀមរាប បានត្រួតពិនិត្យវឌ្ឍនភាពនៃការស្ថាបនាហេដ្ឋារចនាសម្ព័ន្ធផ្លូវទាំង៣៨ខ្សែ និងការស្ដារកែលម្អដងស្ទឹងសៀមរាប ។ ក្នុងឱកាសនោះដែរ មានការចូលរួមពី ឯកឧត្តម ជា សុផារ៉ា ឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាអនុប្រធានគណៈកម្មការអន្តរក្រសួង , ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន និងជាអនុប្រធានអចិន្ត្រៃយ៍គណៈកម្មការអន្តរក្រសួង , ឯកឧត្តម ថោង ខុនរដ្ឋមន្ត្រីក្រសួងទេសចរណ៍ និងជាសមាជិកគណៈកម្មការអន្តរក្រសួង , ឯកឧត្តម ទៀសីហា អភិបាលនៃគណៈអភិបាលខេត្តសៀមរាបនិងសមាជិកគណៈកម្មការអន្តរក្រសួងរួមទាំងមន្ត្រីជំនាញពីក្រសួងនានាជាច្រើនរូបទៀត។ 

គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ និងស្ដារកែលម្អដងស្ទឹងសៀមរាប ត្រូវបានបើកការដ្ឋានសាងសង់ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី នៅថ្ងៃទី៣០ ខែវិច្ឆិកា ឆ្នាំ២០២០ គ្រោងនឹងបញ្ចប់នៅថ្ងៃ ២៩ ខែធ្នូឆ្នាំ២០២១។

ការស្ថាបនាហេដ្ឋារចនាសម្ព័ន្ធផ្លូវ៣៨ ខ្សែប្រវែង ១០៨,៧៤ គីឡូម៉ែត្រគិតត្រឹមថ្ងៃទី១០ ខែវិច្ឆិកាឆ្នាំ២០២១ រួមមានការងារស្ថាបនាតួផ្លូវ ការងារសាងសង់ប្រព័ន្ធលូទឹកកខ្វក់និងលូទឹកភ្លៀង និងការងារតម្លើងបរិក្ខារផ្លូវថ្នល់ ក្នុងនោះរួមមានការងារកាមេរ៉ាសុវត្ថិភាពបង្គោលភ្លើងបំភ្លឺផ្លូវសាធារណៈ បរិក្ខារចរាចរណ៍និងភ្លើងសញ្ញាចរាចរណ៍ និងការដាំដើមឈើសម្រេចជារួមបាន ៨៩,៣៩ភាគរយនៃទំហំការងារសរុប។

ការស្ដារការកែលម្អដងស្ទឹងសៀមរាបទាំងសងចាប់ពីស្ពានរ៉ោករ៉ាក ដល់អាងក្រពើប្រវែងសរុប៩០៥០ម៉ែត្រគិតចាប់ពីថ្ងៃទី៣០ ខែតុលា ឆ្នាំ២០២១ រួមមានការសម្របសម្រួលដោះស្រាយសំណង់បណ្ដោះអាសន្នចេញពីដងស្ទឹងសម្រេចបាន 100% ការយកសំណង់-តូបលក់ដូរចេញពីដងស្ទឹង ការងារស្ដារភក់ពីបាតស្ទឹង ការងារទប់ដីមិនឱ្យបាក់ច្រោះតាមដងស្ទឹង ការងារស្ដារនិងកែលម្អសម្រួលជម្រាលស្ទឹង ការងារសម្អាតនិងពង្រាបដីការងារបំពេញដីតាមមាត់ស្ទឹង ការងារបង្វែរលូទឹកកខ្វក់ ការងារគាស់ដាំកូនឈើឡើងវិញ ការងារចាក់បេតុងកម្រាលថ្មក្រានីតការងារក្រាលថ្មក្រានីត ការងាររៀបចំតារាងកីឡាប៉េតង់ ការងារចាក់បេតុងចំណតរថយន្តទេសចរណ៍RV ការងារដាំស្មៅជប៉ុនការងាររៀបចំខឿនអង្គុយកំសាន្ត ការងារដាំដើមរុក្ខជាតិផ្កាប្របមាត់ស្ទឹង និងការងាររៀបចំភ្លើងបំភ្លឺសាធារណៈ តាមដងស្ទឹងសរុបជារួមបាន៦៦ភាគរយនៃផែនការ៕