ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃព្រហស្បតិ៍ (ទី៦ ខែកុម្ភៈ) បានបញ្ជាក់ថា កងទ័ពអាកាសអ៊ុយក្រែន បានទទួលនូវក្រុមយន្តហោះចម្បាំង Mirage 2000-5 របស់ប្រទេសបារាំង និងយន្តហោះចម្បាំង F-16 របស់ប្រទេសហូឡង់។

លោក Zelenskyy បានសរសេរនៅបណ្ដាញសង្គមថា៖ «ក្រុមដែនអាកាសរបស់អ៊ុយក្រែន នៅតែបន្តអភិវឌ្ឍជានិច្ច»។ យន្តហោះ Mirage 2000 ដំបូងគេពីប្រទេសបារាំង បានមកដល់ហើយ ដោយបន្ថែមសមត្ថភាពការពារដែនអាកាសរបស់យើង។ ខ្ញុំសូមអរគុណលោកប្រធានាធិបតីបារាំង Emmanuel Macron សម្រាប់ការដឹកនាំ និងការគាំទ្ររបស់លោក។ ប្រធានាធិបតីបារាំងគោរពពាក្យសម្ដីរបស់លោក ហើយយើងពិតជាមានអារម្មណ៍ដឹងគុណណាស់។ នេះជាជំហានមួយផ្សេងទៀត ក្នុងការពង្រឹងសន្តិសុខរបស់អ៊ុយក្រែន»។

រដ្ឋមន្ត្រីក្រសួងការពារជាតិបារាំង លោក Sebastien Lecornu (សេបាស្ទៀន ឡឺក័រនុយ) ក៏បានបញ្ជាក់អំពីការបញ្ជូនយន្តហោះចម្បាំង Mirage នេះដែរ ដោយនិយាយថា «ដោយត្រូវបានបញ្ជាដោយអាកាសយានិកអ៊ុយក្រែន ដែលបានហ្វឹកហាត់នៅប្រទេសបារាំងជាច្រើនខែ ឥឡូវនេះយន្តហោះទាំងនោះ នឹងចូលរួមការពារផ្ទៃមេឃរបស់អ៊ុយក្រែន»។ ប៉ុន្តែទាំងលោក Zelenskyy និងលោក Lecornu មិនបានបញ្ជាក់ពីចំនួនដែលអ៊ុយក្រែនបានទទួលនោះទេ។

នៅព្រហស្បតិ៍នោះផងដែរ រដ្ឋមន្ត្រីការពារជាតិអ៊ុយក្រែន លោក Rustem Umerov បានប្រាប់ថា ប្រទេសហូឡង់ បានប្រគល់បន្ថែមនូវយន្តហោះចម្បាំង F-16 ផលិតដោយសហរដ្ឋអាមេរិក ដែលលោកបាននិយាយថា «នឹងចាប់ផ្តើមអនុវត្តបេសកកម្មប្រយុទ្ធ និងពង្រឹងការការពារ ក្នុងពេលឆាប់ៗនេះ» រួមជាមួយនឹងយន្តហោះចម្បាំង Mirage របស់បារាំង។

ហើយលោក Zelenskyy បានបញ្ជាក់បន្ថែមថា៖ «ជាមួយនឹងការផ្ដល់ជូនចុងក្រោយនេះ យើងក៏កំពុងបន្តពង្រីកក្រុមយន្តហោះ F-16 របស់យើងផងដែរ ដោយប្រទេសហូឡង់បានបំពេញតាមការប្តេជ្ញាចិត្តរបស់ខ្លួន ក្នុងការគាំទ្រកិច្ចប្រឹងប្រែងនេះ»៕