អនុប្រធានក្រុមហ៊ុន Nippon Steel Corp. កាលពីថ្ងៃព្រហស្បតិ៍ (ទី៦ ខែកុម្ភៈ) បាននិយាយថា ក្រុមហ៊ុនផលិតដែករបស់ប្រទេសជប៉ុន សង្ឃឹមថា លោកប្រធានាធិបតី Donald Trump នឹងកែប្រែការប្រឆាំងរបស់លោក ចំពោះការគ្រោងទុកទិញយកក្រុមហ៊ុន US Steel Corp. ខណៈដែលកិច្ចព្រមព្រៀងតម្លស ១៤,១ពាន់លានដុល្លារ នឹងបម្រើផលប្រយោជន៍ជាតិរបស់សហរដ្ឋអាមេរិក តាមរយៈការវិនិយោគ។

អំឡុងសន្និសីទសារព័ត៌មាន ស្តីអំពីប្រាក់ចំណូលចុងក្រោយបង្អស់របស់ក្រុមហ៊ុន Nippon Steel លោក Takahiro Mori បាននិយាយថា ផែនការរបស់ក្រុមហ៊ុន Nippon Steel ក្នុងការជំរុញអាជីវកម្មរបស់ក្រុមហ៊ុនអាមេរិក ដោយការបន្ថែមសមត្ថភាពផលិតកម្ម និងការផ្តល់នូវបច្ចេកវិទ្យារបស់ខ្លួន គួរតែ «ស្របយ៉ាងឥតខ្ចោះ» ជាមួយនឹងការអំពាវនាវរបស់លោក Trump សម្រាប់ការវិនិយោគបរទេស។

គួរបញ្ជាក់ថា អតីតប្រធានាធិបតី លោក Joe Biden បានរាំងខ្ទប់កិច្ចព្រមព្រៀងទិញយកនេះ កាលពីដើមខែមករា ដោយលើកឡើងពីហេតុផលសន្តិសុខជាតិ។ លោក Trump ក៏បានជំទាស់នឹងផែនការនេះដែរ អំឡុងពេលធ្វើយុទ្ធនាការបោះឆ្នោតប្រធានាធិបតីសហរដ្ឋអាមេរិក កាលពីឆ្នាំមុន ជាការប៉ុនប៉ងជាក់ស្តែង ដើម្បីឈ្នះការបោះឆ្នោត នៅក្នុងរដ្ឋ Pennsylvania ជារដ្ឋប្រទាញប្រទង់ដ៏សំខាន់ ដែលក្រុមហ៊ុនដែកថែបអាមេរិក និងសហជីពដ៏មានឥទ្ធិពល United Steelworkers មានមូលដ្ឋាននៅទីនោះ។

នៅក្នុងសន្និសីទសារព័ត៌មាននោះ លោក Mori បានបន្ថែមថា លោក Trump «មានសិទ្ធិលុបចោល» ការសម្រេចរបស់លោក Biden។ ការអត្ថាធិប្បាយរបស់លោក បានកើតឡើងនៅពេលដែលនាយករដ្ឋមន្ត្រីជប៉ុន លោក Shigeru Ishiba គ្រោងនឹងជួបពិភាក្សាទល់មុខគ្នាជាលើកដំបូងជាមួយលោក Trump នៅចុងសប្តាហ៍នេះ។ ហើយលោក Mori ដែលជាអនុប្រធានប្រតិបត្តិក្រុមហ៊ុន Nippon Steel បានសង្កត់ធ្ងន់ថា លោកចាត់ទុកជំនួបកំពូលនេះថា ជា «ឱកាស ដើម្បីបើកផ្លូវ» សម្រាប់ការទិញនេះ៕