អនុប្រធានាធិបតីហ្វីលីពីន លោកស្រី Sara Duterte នៅថ្ងៃសុក្រ (ទី៧ ខែកុម្ភៈ) នេះ បាននិយាយថា លោកស្រីបានរៀបចំត្រៀមខ្លួនតាំងពីឆ្នាំមុន ដើម្បីប្រឈមជាមួយនឹងការចោទប្រកាន់ទម្លាក់តំណែង ហើយនឹងស្វាគមន៍វត្តមានក្នុងក្រុមការពាររបស់ឪពុកលោកស្រី ដែលជាអតីតប្រធានាធិបតី លោក Rodrigo Duterte ប្រសិនបើលោកចាប់អារម្មណ៍ចូលរួម។

លោកស្រី Sara Duterte បាននិយាយថា លោកស្រីមិនបានអានពាក្យបណ្តឹងលើរូបលោកស្រី ដែលគាំទ្រដោយសមាជិកសភាជាន់ទាបភាគច្រើននោះទេ ប៉ុន្តែមេធាវីរបស់លោកស្រីកំពុងរៀបចំ សម្រាប់ការកាត់ក្តីនៅព្រឹទ្ធសភា។ ប្រធានព្រឹទ្ធសភា បានប្រាប់ថា ដំណើរការនោះអាចនឹងកើតឡើងក្នុងខែមិថុនា។

អំឡុងសន្និសីទសារព័ត៌មាន នៅពេលត្រូវបានសួរថា តើការលាលែងពីតំណែងជាជម្រើសដែរ ឬទេ លោកស្រី បានឆ្លើយតបថា៖ «យើងមិនទាន់គិតដល់រឿងនោះទេ។ រឿងទាំងនោះនៅឆ្ងាយពេកណាស់»។

គួរបញ្ជាក់ថា ការលើកឡើងរបស់លោកស្រី Duterte គឺជាលើកទី១ របស់លោកស្រី ចាប់តាំងពីសភាជាន់ទាប បានចោទប្រកាន់ទម្លាក់តំណែងលោកស្រី កាលពីថ្ងៃពុធ ដោយចោទប្រកាន់លោកស្រីពីបទរំលោភរដ្ឋធម្មនុញ្ញ ស៊ីសំណូក និងពុករលួយ បទល្មើសព្រហ្មទណ្ឌផ្សេងទៀត និងការក្បត់ទំនុកចិត្តសាធារណៈ។ លោកស្រីបានបដិសេធរាល់ការចោទប្រកាន់ទាំងអស់។

ករណីនេះបានកើតចេញពីការចោទប្រកាន់ ដែលថា លោកស្រីបានប្រើប្រាស់មូលនិធិសាធារណៈមិនត្រឹមត្រូវ ពេលកាន់តំណែងជាអនុប្រធានាធិបតី និងរដ្ឋមន្ត្រីក្រសួងអប់រំ ប្រមូលទ្រព្យសម្បត្តិដែលមិនអាចពន្យល់បាន និងបានគំរាមកំហែងដល់អាយុជីវិតរបស់ប្រធានាធិបតីលោក Ferdinand Marcos Jr ស្ត្រីទីមួយ និងប្រធានសភាជាន់ទាប៕