យោធាអាមេរិក បានប្រាប់ឲ្យដឹងថា សមាជិកយោធាអាមេរិកម្នាក់ និងអ្នកម៉ៅការផ្នែកការពារជាតិ ៣នាក់ បានបាត់បង់ជីវិត កាលពីថ្ងៃព្រហស្បតិ៍ (ទី៦ ខែមកុម្ភៈ) នៅពេលដែលយន្តហោះរបស់ពួកគេ បានធ្លាក់នៅភាគខាងត្បូងប្រទេសហ្វីលីពីន។

នៅក្នុងសេចក្តីថ្លែងការណ៍មួយ ទីបញ្ជាការប្រចាំឥណ្ឌូ-ប៉ាស៊ីហ្វិក (INDOPACOM) បានឲ្យដឹងថា យន្តហោះដែលចុះកិច្ចសន្យាដោយយោធាអាមេរិក បាន និងកំពុងអនុវត្តការគាំទ្រផ្នែកស៊ើបការណ៍ និងការឃ្លាំមើលតាមសំណើរបស់ហ្វីលីពីន។

INDOPACOM ដែលមើលការខុសត្រូវកងកម្លាំងអាមេរិកក្នុងតំបន់ បានឲ្យដឹងនៅក្នុងសេចក្តីថ្លែងការណ៍ថា៖ «យើងអាចបញ្ជាក់បានថា គ្មានអ្នករួចរស់ជីវិតពីការធ្លាក់យន្តហោះនោះទេ»។

នៅក្នុងសេចក្តីថ្លែងការណ៍ដាច់ដោយឡែកមួយ នាថ្ងៃសុក្រ (ទី៧ ខែកុម្ភៈ) នេះ អាជ្ញាធរអាកាសចរណ៍ស៊ីវិលហ្វីលីពីន បានឲ្យដឹងថា យន្តហោះប្រភេទ Beechcraft King Air 300 បានចាកចេញពីទីក្រុង Cebu ភាគកណ្តាលប្រទេសហ្វីលីពីន ហើយកំពុងធ្វើដំណើរទៅកាន់ទីក្រុង Cotabato សម្រាប់បេសកម្មត្រួតពិនិត្យពីលើអាកាស នៅពេលដែលវាបានធ្លាក់នៅទីក្រុង Ampatuan ក្នុងខេត្ត Maguindanao del Sur៕