បេសកជនពិសេសរបស់សហរដ្ឋអាមេរិកសម្រាប់ប្រទេសអ៊ុយក្រែន និងរុស្ស៊ី លោក Keith Kellogg បានថ្លែងថា រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ចាត់ទុកការដាក់ទណ្ឌកម្មប្រឆាំងនឹងរុស្ស៊ីថា មិនគ្រប់គ្រាន់ ហើយកំណត់ទណ្ឌកម្មទាំងនោះ ត្រឹមតែ ៣ នៅលើមូលដ្ឋាន   រង្វាស់ពី ១ ដល់ ១០ ដោយបន្ថែមថា ទីក្រុងវ៉ាស៊ីនតោន កំពុងពិចារណាពីលទ្ធភាពនៃការបង្កើនការរឹតបន្តឹងលើវិស័យថាមពលរបស់រុស្ស៊ី។

លោកបាននិយាយ នៅក្នុងបទសម្ភាសន៍ជាមួយសារព័ត៌មាន New York Post ថា៖«អ្នកពិតជាអាចបង្កើនការដាក់ទណ្ឌកម្ម ជាពិសេសទណ្ឌកម្មចុងក្រោយបំផុត [កំណត់គោលដៅលើផលិតកម្ម និងការនាំ        ចេញប្រេង] ។

លោក Kellogg បានបន្ថែមថា ការអនុវត្តទណ្ឌកម្មលើប្រទេសរុស្ស៊ីគឺ «ត្រឹមតែបី» នៅលើមូលដ្ឋានរង្វាស់ ពី១ ទៅ ១០ លើថាតើសម្ពាធសេដ្ឋកិច្ចអាចធ្វើឲ្យប៉ះពាល់បែបណា។

កាលពីថ្ងៃទី១០ ខែមករា រដ្ឋបាលរបស់អតីតប្រធានាធិបតីអាមេរិក លោក ចូ បៃដិន (Joe Biden) បានប្រកាសកញ្ចប់ទណ្ឌកម្មទ្រង់ទ្រាយធំប្រឆាំងនឹងវិស័យប្រេង និងឧស្ម័នរបស់រុស្ស៊ី។ ការរឹតបន្តឹង ត្រូវបានដាក់លើក្រុមហ៊ុនរុស្ស៊ី Gazprom Neft និង Surgutneftegas, Gazprom's Portovaya និងរោងចក្រ Vysotsk LNG ដែលដឹកនាំដោយក្រុមហ៊ុនNovatek ។ ជាងនេះទៅទៀត នាវាដឹកប្រេងចំនួន ១៨៣គ្រឿង ពាណិជ្ជករ ក្រុមហ៊ុនផ្តល់សេវាអណ្តូងប្រេង ប្រធានក្រុមហ៊ុនប្រេងមួយចំនួន និងតំណាងថ្នាក់ដឹកនាំក្រសួងថាមពលរុស្ស៊ី ត្រូវបានដាក់ក្នុងបញ្ជីខ្មៅ។