សហភាពអឺរ៉ុប (EU) នៅថ្ងៃសុក្រ (ទី៧ ខែកុម្ភៈ) នេះ បានព្រមានថា ការដាក់ទណ្ឌកម្មលើតុលាការឧក្រិដ្ឋកម្មអន្តរជាតិ (ICC) គំរាមកំហែងឯករាជ្យភាពរបស់ស្ថាប័ននេះ និងប្រព័ន្ធតុលាការដ៏ទូលំទូលាយ បន្ទាប់ពីប្រធានាធិបតីអាមេរិក លោក Donald Trump បានដាក់ទណ្ឌកម្មលើស្ថាប័នតុលាការនេះ ដោយសារការស៊ើបអង្កេតលើសហរដ្ឋអាមេរិក និងអ៊ីស្រាអែល។

លោក Trump បានចុះហត្ថលេខាលើក្រឹត្យមួយ កាលពីថ្ងៃព្រហស្បតិ៍ (ទី៦ ខែកុម្ភៈ) ដោយបានលើកឡើងថា តុលាការនៅទីក្រុងឡាអេ បាន «បំពានអំណាចរបស់ខ្លួន» ដោយចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu ដែលលោកបានជួបពិភាក្សា កាលពីដើមសប្តាហ៍នេះ។

ប្រធានក្រុមប្រឹក្សាអឺរ៉ុបដែលតំណាងឲ្យរដ្ឋសមាជិកទាំង ២៧ របស់ EU គឺលោក Antonio Costa បានសរសេរនៅលើបណ្ដាញសង្គម X ថា៖ «ការដាក់ទណ្ឌកម្មលើ ICC គំរាមកំហែងដល់ឯករាជ្យភាពរបស់តុលាការ និងធ្វើឲ្យខូចដល់ប្រព័ន្ធយុត្តិធម៌ព្រហ្មទណ្ឌអន្តរជាតិទាំងមូល»។

ចំណែកគណៈកម្មការអឺរ៉ុប បានសម្តែងនូវ «ការសោកស្តាយ» ដាច់ដោយឡែក ទាក់ទងនឹងការដាក់ទណ្ឌកម្មរបស់លោក Trump ដោយសង្កត់ធ្ងន់លើ «សារៈសំខាន់ជាមូលដ្ឋានរបស់ ICC ក្នុងការលើកកម្ពស់យុត្តិធម៌ ពាក់ព័ន្ធនឹងបទល្មើសព្រហ្មទណ្ឌអន្តរជាតិ និងការប្រយុទ្ធប្រឆាំងនឹងនិទណ្ឌភាព»។

អ្នកនាំពាក្យរបស់គណៈកម្មការមួយរូប បាននិយាយថា ក្រឹត្យនេះបង្កជាហានិភ័យប៉ះពាល់ដល់ការស៊ើបអង្កេត និងវិធានការនានាដែលកំពុងបន្តមាន ក្នុងនោះរួមទាំងបញ្ហាអ៊ុយក្រែន ដែលធ្វើឲ្យខូចដល់កិច្ចប្រឹងប្រែងជាច្រើនឆ្នាំ ក្នុងការធានាឲ្យបាននូវការទទួលខុសត្រូវ ជុំវិញពិភពលោក៕