តុលាការឧក្រិដ្ឋកម្មអន្តរជាតិ (ICC) នៅថ្ងៃសុក្រនេះ បានវាយបកវិញ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានដាក់ទណ្ឌកម្មលើស្ថាប័ននេះ ដោយប្តេជ្ញាថា ខ្លួននឹងបន្តផ្តល់ «យុត្តិធម៌ និង  ក្តីសង្ឃឹម»ជុំវិញពិភពលោក។

តុលាការបានលើកឡើងនៅក្នុងសេចក្តីថ្លែងការណ៍មួយថា៖«ICC ថ្កោលទោសការចេញដោយសហរដ្ឋអាមេរិនូវក្រឹត្យដែលស្វែងរកការដាក់ទណ្ឌកម្មលើមន្ត្រីរបស់ខ្លួន និងធ្វើឲ្យប៉ះពាល់ដល់ការងារតុលាការឯករាជ្យ និងឥតលម្អៀងមួយនេះ»។

តុលាការដែលមានមូលដ្ឋាននៅទីក្រុងឡាអេនៃប្រទេសហូឡង់ បានបន្ថែមថា៖៖«តុលាការ ឈរយ៉ាងរឹងមាំដោយបុគ្គលិករបស់ខ្លួន ហើយសន្យាបន្តផ្តល់យុត្តិធម៌ និងក្តីសង្ឃឹម ដល់ជនរងគ្រោះស្លូតត្រង់រាប់លាននាក់ ដោយអំពើឃោរឃៅ នៅទូទាំងពិភពលោក»។

ការវាយប្រហារលើតុលាការ ICC សម្រាប់អ្វីដែលលោក បាននិយាយថា ជាការស៊ើបអង្កេត «ខុសច្បាប់ និងគ្មានមូលដ្ឋាន» ដែលផ្តោតលើអាមេរិក និងអ៊ីស្រាអែល ដែលជាសម្ព័ន្ធមិត្តរបស់ខ្លួននោះ លោក ត្រាំ បានដាក់ដាក់ទណ្ឌកម្មទៅលើតុលាការនេះ កាលពីថ្ងៃព្រហស្បតិ៍។

លោកបានបញ្ជាឲ្យបង្កកទ្រព្យសម្បត្តិ និងការហាមឃាត់ការធ្វើដំណើរប្រឆាំងនឹងមន្ត្រី ICC បុគ្គលិក និងសមាជិកគ្រួសាររបស់ពួកគេ រួមជាមួយនឹងអ្នកដែលត្រូវបានចាត់ទុកថា បានជួយដល់ការស៊ើបអង្កេតរបស់តុលាការនេះ។