បាល់ទាត់៖ ក្រុមបាល់ទាត់ព្រះខ័នរាជស្វាយរៀង នៅសល់ក្តីសង្ឃឹមប្រជែងពានជើងឯកលីគកំពូលកម្ពុជា Metfone Cambodian League រដូវកាលនេះដោយរង់ចាំអ៊ុតនៅសប្តាហ៍ចុងក្រោយបន្ទាប់ពីក្រុមលេខ ១ និងលេខ ២ វិសាខា និងភ្នំពេញស្មើគ្នានៅកីឡដ្ឋានព្រីនស៍។ ក្រុមជើងឯកលីគកំពូលកម្ពុជាឆ្នាំ២០១៣ និង ២០១៩ ព្រះខ័នរាជស្វាយរៀងមិនឱកាសរបស់ខ្លួនរំលងផុតឡើយ នៅពេលក្រុមកំពូលទាំងពីរស្មើគ្នាដោយបានយកឈ្នះក្រុមគិរីវង្សសុខសែនជ័យ ៦-០ នៅកីឡដ្ឋានខេត្តស្វាយរៀង។
ខ្សែប្រយុទ្ធកាមេរូន Jean Maria Privat ជាថ្មីទៀតបានក្លាយជាតួឯកក្នុងជ័យជំនះរបស់ព្រះខ័នរាជស្វាយរៀង បន្ទាប់ពីរកបានដល់ទៅ ៤គ្រាប់ម្នាក់ឯង ខណៈពីរគ្រាប់ទៀតធ្វើបានដោយប្អូនប្រុស Emmanuel Junior និង Mika។ បួនគ្រាប់របស់ Privat ធ្វើឱ្យម្ចាស់អាវលេខ ១០ រូបនេះរំកិលឡើងឈរលេខ ២ ក្នុងតារាងអ្នកស៊ុតបញ្ចូលទីច្រើនជាងគេមានសរុប ១៩គ្រាប់តាមពីក្រោយ Marcio de Oliveira របស់ណាហ្កាវើលតែ ១គ្រាប់ប៉ុណ្ណោះ។ បីពិន្ទុនេះធ្វើឱ្យព្រះខ័នរាជស្វាយរៀងនៅសល់ក្តីសង្ឃឹមអ៊ុតជើងឯកដល់សប្តាហ៍ចុងក្រោយ ទោះបន្តឈរលេខ ៣ ក្នុងតារាងតែមាន ៣៩ពិន្ទុស្មើគ្នាជាមួយក្រុមលេខ ២ វិសាខា និងដេញពីក្រោយក្រុមលេខ ១ ភ្នំពេញក្រោន ២ពិន្ទុ។ ងាកទៅទស្សនាការប្រកួតរបស់ក្រុមកំពូលទាំងពីរវិសាខា និងភ្នំពេញក្រោននោះគឺក្រុមម្ចាស់ផ្ទះរកបានគ្រាប់នាំមុខមុននៅនាទីទី៥ ដោយ Lee Jaegun តែភ្នំពេញក្រោនតាមស្មើវិញដោយ Andres Nieto នៅនាទីទី២៤ ដោយបាល់ពិន័យ ១១ម៉ែត្រ។
មិនមានលទ្ធផលអ្វីប្រែប្រួលឡើយសំរាប់ការប្រកួត ដែលមានការរំខានដោយសារភ្លៀងធ្លាក់ខ្លាំងជោគជាំ តែម្ចាស់ផ្ទះវិសាខាបាត់បង់កីឡាករម្នាក់គឺ រឹង ប៊ុនហៀង មានរបួសដល់បាក់កជើងក្រោយប៉ះទង្គិចជាមួយ អន ចាន់ប៉ូលីន។ សំរាប់សប្តាហ៍ចុងក្រោយលីគកំពូលកម្ពុជានឹងធ្វើឡើងនៅថ្ងៃសុក្រសប្តាហ៍នេះ ដោយរួមមានភ្នំពេញក្រោនទទួលបឹងកេតនៅ Smart RSN Stadium, វិសាខាទៅទឹកដី Tiffy Army កីឡដ្ឋានស្តាតចាស់ និងព្រះខ័នរាជស្វាយរៀងទៅទឹកដីអង្គរថាយហ្គឺរ។ លទ្ធផលគូផ្សេងៗទៀតចុងសប្តាហ៍កន្លងទៅរួមមាន Tiffy Army ចាញ់ណាហ្កាវើលក្នុងទឹកដីខ្លួនឯង ១-៣ បឹងកេត និងអង្គរថាយហ្គឺរស្មើគ្នា ១-១ នៅទឹកដី Cambodia Airways និងសូលទីឡូអង្គរស្មើគ្នា ១-១ ជាមួយនឹងព្រៃវែងនៅសៀមរាប៕
អត្ថបទ ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
