ស្ទឹងនៅក្នុងទីក្រុង Buenos Aires ប្រទេសអាហ្សង់ទីន បានប្រែក្លាយជាស្ទឹងឈាមកាលពីថ្ងៃព្រហស្បតិ៍ម្សិលមិញ ធ្វើឲ្យអ្នកស្រុកព្រួយបារម្ភ ដោយពួកគេសង្ស័យថា ការប្រែពណ៌ទឹកស្ទឹងទៅជាពណ៌ក្រហមឆ្អាលបែបនេះ អាចបណ្តាលមកពីការកំពប់សារធាតុពុល ។

សារព័ត៌មានក្នុងស្រុក រាយការណ៍ថា ក្រុមអាជ្ញាធរ បានប្រមូលសំណាកពីស្ទឹងដែលហូរទៅកាន់ពាម Rio de la Plata និងតំបន់ព្រំដែនដែលជាតំបន់អភិរក្សអេកូឡូស៊ី ដើម្បីកំណត់មូលហេតុនៃការប្រែពណ៌បែបនេះ ។

ក្រុមអ្នកស្រុក ព្យាករណ៍ថា ស្ទឹងប្រែពណ៌ក្រហមបែបនេះ អាចបណ្តាលមកពីសារធាតុពុលអានីលីន ឬកាកសំណល់គីមីចេញពីដេប៉ូក្បែរនោះ ។

ទីក្រុង Buenos Aires និងក្រសួងបរិស្ថានក្រុង Buenos Aires និយាយថា ពួកគេកំពុងស៊ើបអង្កេតលើករណីស្ទឹងឈាមមួយនេះ ហើយសេចក្តីរាយការណ៍ដំបូង បានលើកឡើងថា សារធាតុអាចនឹងគ្មានជាតិពុលនោះទេ ៕