នាយករដ្ឋមន្រ្តី លោក Viktor Orban បានប្រាប់វិទ្យុរដ្ឋ នៅថ្ងៃសុក្រ (ទី៧ ខែកុម្ភៈ) នេះ ដោយសំដៅទៅលើកម្មវិធីរបស់ USAID ថា ប្រទេសហុងគ្រីនឹងចាត់វិធានការ ដើម្បីធានាឲ្យបានថា ការផ្តល់ជំនួយទាំងអស់ដែលមកពីសហរដ្ឋអាមេរិកដល់អង្គការមិនមែនរដ្ឋាភិបាល (NGO) និងប្រព័ន្ធផ្សព្វផ្សាយដែលរិះគន់រដ្ឋាភិបាល នឹងត្រូវប្រកាសឲ្យដឹង។

លោក Orban ដែលជាសម្ព័ន្ធមិត្តរបស់ប្រធានាធិបតីអាមេរិក លោក Donald Trump បាននិយាយថា ដល់ពេលវេលាហើយ ដើម្បី «លុបបំបាត់បណ្តាញបរទេសទាំងនេះ» ដ្បិតរដ្ឋបាលរបស់លោក Trump ក៏កំពុងពិចារណាបញ្ចូលគ្នានូវទីភ្នាក់ងារជំនួយអន្តរជាតិរបស់សហរដ្ឋអាមេរិក (USAID) ទៅក្នុងក្រសួងការបរទេស ជាការកែប្រែដ៏សំខាន់មួយ ដែលនឹងតម្រឹមការចំណាយរបស់ខ្លួនឲ្យត្រូវចនឹងគោលនយោបាយ «America First» (អាមេរិកទី១) របស់លោក Trump។

លោក Orban បាននិយាយថា៖ «នៅអាមេរិក យើងនឹងហៅពួកគេជាទីភ្នាក់ងារ ព្រោះពួកគេមិនបម្រើប្រទេសរបស់ពួកគេទេ ប៉ុន្តែទទួលយកលុយពីអំណាចមួយផ្សេងទៀត។ យើងមិនហៅពួកគេជាទីភ្នាក់ងារទេ ព្រោះបុគ្គល និងអង្គការទាំងនេះ បានទទួលប្រាក់ពីបរទេស ដើម្បីយកមកធ្វើការងារផ្តួលរំលំរដ្ឋាភិបាលហុងគ្រី»។

មេដឹកនាំជាតិនិយមហុងគ្រី ដែលប្រឈមមុខនឹងការបោះឆ្នោតនៅដើមឆ្នាំ២០២៦ បានសង្គត់ធ្ងន់ថា អ្នកទទួលមូលនិធិបរទេសទាំងនេះ ត្រូវតែប្រឈមមុខនឹង «ផលវិបាកផ្លូវច្បាប់» ហើយត្រូវតែរឹតបន្តឹង ដោយសារពួកគេបង្កការគំរាមកំហែងដល់អធិបតេយ្យភាពហុងគ្រី។

លោក Orban ដែលកាន់អំណាចតាំងពីឆ្នាំ២០១០ បានអនុម័តច្បាប់មួយ នៅចុងឆ្នាំ២០២៣ ដែលបង្កើតអាជ្ញាធរមួយ គឺការិយាល័យការពារអធិបតេយ្យភាព ដើម្បីរុករក និងតាមដានហានិភ័យនៃអ្វីដែលហៅថា ការជ្រៀតជ្រែកផ្នែកនយោបាយ៕