ទីស្នាក់ការកណ្តាលរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) មើលទៅខុសប្លែក កាលពីថ្ងៃសុក្រ ទី៧ ខែកុម្ភៈ ដោយស្លាកដែលដាក់ឈ្មោះទីភ្នាក់ងារនេះ ត្រូវបានទម្លាក់ចុះ ហើយឡូហ្គោ ត្រូវបានបិទបាំង។

ចៅក្រមអាមេរិកមួយរូប កាលពីថ្ងៃសុក្រ បាននិយាយថា លោកនឹងដាក់សេចក្តីបង្គាប់កំណត់ ដែលរារាំងរដ្ឋបាល លោក Trump ជាបណ្តោះអាសន្ន ពីការចាត់វិធានការមួយចំនួនដើម្បីរុះរើទីភ្នាក់ងារ USAID ហើយបុគ្គលិក២.២០០នាក់ មកពីទីភ្នាក់ងារនេះ នឹងពុំត្រូវឱ្យឈប់សម្រាក ភ្លាមៗនោះដែរ។

ចៅក្រមតំបន់ របស់សហរដ្ឋអាមេរិក លោក Carl Nichols នៅទីក្រុងវ៉ាស៊ីនតោន ជាអ្នកដែលត្រូវបានតែងតាំងដោយលោក Trump ក្នុងអំឡុងអាណត្តិដំបូងរបស់លោក បានប្រកាសការសម្រេច នៅក្នុងសវនាការលើបណ្តឹងមួយពីសហជីពបុគ្គលិករដ្ឋាភិបាលធំបំផុតរបស់សហរដ្ឋអាមេរិក និងសមាគមបុគ្គលិកសេវាបរទេស ដែលបានប្តឹងដើម្បីបញ្ឈប់រដ្ឋបាលនេះ ពីការរុះរើទីភ្នាក់ងារUSAID។

រដ្ឋបាល នៅក្នុងសេចក្តីជូនដំណឹង ដែលបានផ្ញើទៅបុគ្គលិកទីភ្នាក់ងារជំនួយបរទេស កាលពីថ្ងៃព្រហស្បតិ៍ ទី៦ ខែកុម្ភៈ បាននិយាយថា ខ្លួននឹងរក្សាទុកបុគ្គលិកសំខាន់ៗចំនួន៦១១នាក់នៅទីភ្នាក់ងារ USAID ក្នុងចំណោមកម្លាំងការងារនៅទូទាំងពិភពលោកដែលមានចំនួនសរុបជាង១០.០០០នាក់។

មន្ត្រីក្រសួងយុត្តិធម៌ លោក Brett Shumate បានប្រាប់លោក Nichols ថា បុគ្គលិករបស់ទីភ្នាក់ងារ USAID ប្រហែល២.២០០នាក់ នឹងត្រូវឲ្យឈប់សម្រាកដោយបង់ប្រាក់ ក្រោមផែនការរបស់រដ្ឋបាល។

ការរុះរើទីភ្នាក់ងារនេះ ភាគច្រើនត្រូវបានគ្រប់គ្រងដោយមហាសេដ្ឋីជំនួញ លោក Elon Musk ជាអ្នកមានបំផុតរបស់ពិភពលោក និងជាសម្ព័ន្ធមិត្តជិតស្និទ្ធរបស់លោក Trump ដែលដឹកនាំកិច្ចខិតខំប្រឹងប្រែងរបស់ប្រធានាធិបតី ដើម្បីធ្វើឲ្យការិយាធិបតេយ្យសហព័ន្ធរួមតូច។