ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃសុក្រ ទី៧ ខែកុម្ភៈ បាននិយាយថា លោកនឹងបណ្តេញភ្នាក់ងារ FBI មួយចំនួន ជាអ្នកដែលជាប់ពាក់ព័ន្ធក្នុងការស៊ើបអង្កេតការវាយប្រហារកាលពីថ្ងៃទី ៦ ខែមករា ឆ្នាំ២០២១ លើវិមានកាពីតូលរបស់សហរដ្ឋអាមេរិក។

លោក Trump បាននិយាយនៅក្នុងសន្និសីទសារព័ត៌មានមួយជាមួយនាយករដ្ឋមន្រ្តីជប៉ុន នៅឯសេតវិមាន ដោយពុំបានផ្តល់ព័ត៌មានលម្អិតបន្ថែមអំពីចំនួនភ្នាក់ងារដែលនឹងត្រូវបណ្តេញចេញ ឬនៅពេលណា នោះទេ។

រដ្ឋបាលរបស់លោក Trump បានព្រមព្រៀងកាលពីថ្ងៃសុក្រ មិនបញ្ចេញឈ្មោះជាសាធារណៈចំពោះបុគ្គលិក FBI ដែលពាក់ព័ន្ធក្នុងការស៊ើបអង្កេតលើការវាយប្រហារកាលពីថ្ងៃទី៦ ខែមករា ឆ្នាំ២០២១ លើវិមាន Capitol របស់សហរដ្ឋអាមេរិក ដោយបានឈានដល់កិច្ចព្រមព្រៀងបណ្តោះអាសន្នជាមួយភ្នាក់ងារដែលបានប្តឹង ជុំវិញការព្រួយបារម្ភអំពីឯកជនភាព និងសុវត្ថិភាព។

កិច្ចព្រមព្រៀង ដែលចៅក្រមសហព័ន្ធបានអនុម័ត រារាំងរដ្ឋបាលពីការបញ្ចេញឈ្មោះរហូតដល់យ៉ាងហោចណាស់ចុងខែមីនា ខណៈបណ្តឹងតវ៉ាពីក្រុមទីភ្នាក់ងារ FBI ចំនួនពីរក្រុម បានធ្វើឡើង។